SEPTEMBA 26, 2019
ITALIA

Uzinduzi wa Jiwe la Msingi la Kumbukumbu ya Mashahidi wa Yehova Walioteswa na Wanazi na Wafashisti Nchini Italia

CHEZA

Jiwe la msingi limewekwa huko Risiera di San Sabba, Trieste. Mashahidi wa Yehova katika kambi za mateso walivaa pembetatu za zambarau katika sare zao

Mei 10 2019, maofisa wa serikali, wanahistoria, waandishi wa habari, na mamia ya wageni wengine walihudhuria tukio la uzinduzi wa jiwe la msingi la kumbukumbu ya maelfu ya ndugu na dada zetu ambao waliteswa na Wanazi na Wafashisti. Tukio hilo lilifanyika huko Risiera di San Sabba, Trieste, kaskazini-mashariki mwa Italia. Zamani, kambi hiyo ya mateso ilikuwa eneo la kupuria mpunga na pia kambi pekee yenye sehemu ya kuchomea maiti. Uzinduzi huo ulivutia vyombo vya habari katika eneo hilo na sehemu nyingine mojawapo ikiwa ni kituo kinachotazamwa zaidi nchini cha Canale 5.

Msemaji wa Mashahidi wa Yehova nchini Italia Christian Di Blasio, alifungua tukio hilo kwa hotuba iliyokazia ushikamanifu. Alisema: “Ni Mashahidi wa Yehova peke yao walioteswa kwa sababu tu ya msimamo wao wa kidini chini ya Utawala wa Nazi. Wao ndio kikundi pekee cha kidini kilichokuwa na nafasi ya kuokoka kuuawa kwa sababu ya imani. Walihitaji tu kukana imani yao ya Kikristo na kuunga mkono utawala huo. Hata hivyo walikuwa na ujasiri wa kushikamana na viwango vyao vya Kikristo, yaani, kuwa washikamanifu kwa Mungu na upendo kwa wengine.” Kisha, Ndugu Di Blasio akaonyesha video ya mahojiano pamoja na Dada Emma Bauer, ambaye alisimulia kuhusu mateso ambayo yeye na familia yake walipitia wakati wa Vita vya Pili vya Ulimwengu. Alisema kwamba Wakristo wa kweli hawatakana viwango vyao hata ikiwa watakufa. Katika umalizio wa tukio hilo, meya wa Trieste, Roberto Dipiazza, alihutubia wasikilizaji pia. Alisema: Ninafurahia sana uzinduzi huu. Tunahitaji kuhakikisha kwamba mateso ya aina hiyo hayajirudii tena. Kisha jiwe lilizinduliwa.

Wasomi wengi na watu maarufu walitoa maoni yao kuhusu umuhimu wa tukio hilo. Kwa mfano, Giorgio Bouchard, rais mstaafu wa Shirikisho la Makanisa ya Kievanjeli la Italia alisema: “Hakuna kanisa lolote lililowahi kulipa malipo ya damu ya hali ya juu sawa na Mashahidi wa Yehova. . . . Hata hivyo mateso haya hatari yameimarisha msimamo wao, ambao umejitokeza kuhukumu historia na tunaamini kwamba katika hukumu ya Mungu hili ndilo kanisa pekee la Kikristo ambalo lilipingwa kama kikundi na Utawala wa Nazi.” (Kwa maoni zaidi, tazama sandukku lililo chini.)

Inatazamiwa kwamba watu 120,000 watatembelea eneo hili la kihistoria la Risiera di San Sabba kila mwaka. Wageni wote watapata nafasi ya kuangalia jiwe hili likiwa kama kumbukumbu ya maelfu ya Mashahidi wa Yehova ambao licha ya kupatwa na mateso ya Wanazi na Wafashisti, walidumisha imani yao na msimamo wao wa kutokuunga mkono upande wowote wa siasa.—Ufunuo 2:10.

Sergio Albesano

(Mwanahistoria wa Turin)

Niliwafahamu Mashahidi wa Yehova wakati wa masomo yangu kuhusu wale waliokataa utumishi wa kijeshi kwa sababu ya dhamiri nchini Italia. Njia yao ya maisha ilinivutia sana. Ingawa mimi ni Mbudha, ninawaheshimu sana kwa sababu ya imani yao yenye nguvu. Imani hiyo iliwasaidia kufanya msimamo wao wa kidini uwe na nguvu zaidi na hata ilipohitajika kufa ili wasikane imani yao.

Luigi Berzano

(Mwanasoshologia, Profesa wa Chuo kikuu cha Turin, mhariri wa Annual Review of the Sociology of Religion)

Imechukua muda mrefu sana kwa mateso ya mashahidi wa Yehova kutambuliwa na kuheshimiwa licha ya ushahidi wa watu wengi walionusurika mateso hayo na taarifa za kihistoria zenye kutegemeka. Hatimaye, ushahidi mkubwa wa imani na viwango vya kiraia vya Mashahidi zaidi ya 25,000 walioteswa nchini Ujerumani umetangazwa hadharani. . . . Jambo lililowapata Mashahidi lilikuwa, na bado linaendelea kuwa ushahidi wa pekee sana wa kidini na hivyo kuufanya kuwa wenye thamani zaidi kuliko watu wengine wote walioteseka.

Giorgio Bouchard

(Rais mstaafu wa Shirikisho la Makanisa ya Kievanjeli la Italia)

Wakati wahudumu wa “makanisa makubwa” (Walutheri na Wakatoliki) wakipiga mwendo sambamba na majeshi ya Kijerumani mpaka Stalingrad [Volgograd], mamia ya Mashahidi wa Yehova walikuwa wakifa magerezani na katika kambi za mateso kama waathiriwa wa mauaji ya imani na uhuru wa dhamiri. . . . Hakuna kanisa lolote lililowahi kulipa malipo ya damu ya hali ya juu sawa na Mashahidi wa Yehova. . . . Hata hivyo mateso haya hatari yameimarisha msimamo wao, ambao umejitokeza kuhukumu historia (na tunaamini kwamba katika hukumu ya Mungu) hili ndilo kanisa pekee la Kikristo ambalo lilipingwa kama kikundi na Utawala wa Nazi.

Giuseppina Celloni

(Mwanasaikolojia huko Trieste)

Kwa muda mrefu, mateso dhidi ya kikundi hiki cha kidini chini ya Utawala wa Nazi na Wafashisti yamepuuzwa. Jiwe hili lililowekwa katika sehemu muhimu ya kihistoria ni kwa heshima ya maelfu ya Mashahidi wa Yehova waliokuwa na ujasiri, ushikamanifu, na imani katika kanuni muhimu za Kikristo kwa lengo la kuishi kwa amani. . . . Mashahidi wa Yehova walionusurika wamefanikiwa kushinda mshtuko waliopata kwa kufuatilia njia ya maisha yenye amani na kudumisha imani yenye nguvu ya “siku mpya” yaani wakati ujao ambapo mateso kama hayo hayatakuwepo tena na hakuna mtu yeyote atakayejiuliza, ‘Kwa nini?’

Maurizio Costanzo

(Mwandishi wa habari na mtangazaji wa televisheni huko Rome)

Hatuwezi kuwasahau maelfu ya Mashahidi wa Yehova kutoka nchi mbalimbali za barani Ulaya ambao walipelekwa katika kambi za mateso. Kati yao, 1,500 walikufa. Kwa upande mwingine, haishangazi kwamba Mashahidi wa Yehova waliteswa chini ya Utawala wa Nazi na Wafashisti si kwa sababu ya tofauti ya rangi za ngozi, bali kwa sababu ya kuonyesha imani, amani na kutounga mkono upande wowote wa siasa, mambo ambayo bado yalikuwa hayajakubalika. Huu ni ukurasa muhimu katika historia ya Mashahidi wa Yehova, hivyo basi ni vizuri kuikumbuka kwa heshima kubwa sana.

Annamaria Fiorillo

(Naibu mwendesha mashtaka wa serikali, Mahakama ya Milan ya Kesi za Watoto)

Ni muhimu kukumbuka kwamba Mashahidi wa Yehova walikuwa tishio kwa Utawala wa Nazi kwa sababu ya maoni yao ya ulimwengu ya kuheshimu utakatifu wa uhai. Jambo hili halikuunga mkono mpango ya serikali hii wa kutawala ulimwengu wote uiotegemea kanuni ya Ukuu wa jamii ya Kiarya. . . . Mashahidi wa Yehova, yaani wale waliokataa utumishi wa kijeshi na kukataa kukana imani yao hata ikiwa wangeuawa walikuwa zaidi ya wale waliouawa kwa sababu ya imani tu. Leo, kama wakati huo, wanaweza kutajwa kuwa wateteaji wenye ujasiri wa amani na wasiounga mkono jeuri. Wamekuwa mfano mzuri wa ukuu wa kibinadamu na tumaini kwa vizazi vijavyo.

Anna Foa

(Profesa wa Historia ya Kisasa, Chuo Kikuu cha La Sapienza, Rome)

Waandishi wa historia hawakuchunguza kuhusu “pembe tatu za zambarau” wala kukumbuka mateso yao mpaka miaka ya 1990. Sababu kuu ya kukosa kujua au kuwakumbuka ni ukweli wa kwamba, bado Mashahidi wa Yehova waliendelea kuteswa huko Mashariki mwa Ujerumani ambapo vita hivyo vilitokea. Wakituhumiwa kuwa maadui wa ujamaa, mawakala wa wabeberu wa Kimarekani, na wapelelezi, Mashahidi walifungwa tena—4,000 wakihukimiwa kifungo cha gerezani na wengine 1,000 wakifungwa bila kupelekwa mahakamani. Ilikuwa baada tu ya muungano wa Ujerumani mwaka wa 1989 ambapo historia yao iliibuka tena na mateso yao yakatambuliwa. Mateso haya hayakuwahusu wanaume tu, lakini kama Mwanahistoria Adriana Lotto anavyosema, wanawake pia walifungwa ili kuwazuia wasiwashawishi watoto wao na kuwachochea kuwa wapinga vita. Mwanzoni, mwaka wa 1933, waliwakilisha kikundi kikubwa zaidi katika kambi zote (kikundi cha pili kwa ukubwa baada ya wanawake wa Kikomunisti) haswa katika kambi ya wanawake ya Ravensbrück. Wakiwa huko, walionekana kuwa tofauti kwa sababu ya ujasiri wao kwa kukataa kufanya kazi zozote zilizohusiana na jeshi au vita (kama vile kushona sare za wanajeshi au kupeleka mboga za majani kwa wanajeshi wa SS). Hivyo walipata adhabu kali na hata wakati mwingine kuhukumiwa kifo.

Maria Fausta Maternini

(Profesa wa Ulinganishi wa Sheria za Kidini wa Chuo Kikuu cha Trieste)

Nilihudhuria kwa hamu kubwa tukio lenye kuhuzunisha na kugusa moyo huko Risiera di San Sabba, lililosisitizia thamani ya ushahidi wa Mashahidi wa Yehova ambao, walikuwa tayari kufa kuliko kukana imani yao. . . . Leo, kama katika ilivyokuwa katika miaka hiyo iliyopita, lengo linaloendelea la Mashahidi wa Yehova linachangia kwa kiasi kikubwa kusambaza viwango ambavyo ndilo takwa la kwanza ili kuwe na amani na watu waishi pamoja kwa upatano. Nawashukuru sana kwa mwaliko wa kuhudguria tukio hili na ninashukuru kwa ushahidi wa kina uliotolewa na Mashahidi wa Yehova.

Marzio Pontone

(Mwanasheria huko Turin)

Nimepigana vita vya kisheria kwa miaka 25 katika mahakama za kijeshi na za kiraia nchini Italia kwa ajili ya “uhuru wa fikira za kidini” wa Mashahidi. Jambo hakika ni kwamba Mashahidi wote wana mambo matatu ya msingi. Wote: (1) wana upatano thabiti, (2) ni washikamanifu and (3) hawabadili msimamo wao wa kufuata na kutii kile ambacho kwao ni maagizo ya Yehova. Baadhi ya Mashahidi hata wakubali kufa ili wasikane imani yao—pembe tatu za zambarau ni mfano mzuri wa jambo hili. Sidhani kama nitakuwa nimepitiliza ninaposema kwamba baaadhi ya Mashahidi wamekuwa “wafia imani wa kweli.” Ninaweza kusema mambo mazuri kuhusu Mashahidi wa Yehova kwa sababu ninaamini kwamba wanastahili heshima kutoka kwa hata wale ambao kama mimi, wana dini nyingine (Mkatoliki).

Guido Raimondi

(Rais Mstaaafu wa Mahakama ya Ulaya ya Haki za Kibinadamu)

Ninawashukuru sana wale walioandaa tukio hili muhimu, ambalo linatukumbusha mateso ya maelfu ya Mashahidi wa Yehova ambao waliathiriwa na ukatili huu wa Wanazi. Ni kwa sababu yao pia kwamba kulikuwa na msukumo mkubwa katika jamii na raia ambao ulitokeza mradi wa Ulaya na pia Mahakama ya Ulaya ya Haki za Kibinadamu.. . . Sisi tukiwa kama raia wa Ulaya, tunawashukuru na kuwakumbuka.

Bruno Segre

(Mwanasheria, mwandishi wa habari, na mwazilishi wa gazeti la L’Incontro, huko Turin)

Nikiwa kama mhamasishaji wa miswada ya kutambuliwa kwa wale wanaokataa utumishi wa kijeshi nchini Italia, nimekuwa na nafasi ya kutetea mamia ya vijana Mashahidi wa Yehova katika mahakama za kijeshi. Ninaweza kuwahakikishia kwamba uimara wa imani yao inayoongozwa na kanuni za unyoofu, kujidhabihu na umoja wao ulinichochea sana.

Huenda Ukapenda Pia

TAARIFA ZA HABARI

https://cms-imgp.jw-cdn.org/img/p/702019187/univ/art/702019187_univ_sqr_xl.jpg

Mashahidi wa Yehova

Uzinduzi wa Jiwe la Msingi la Kumbukumbu ya Mashahidi wa Yehova Walioteswa na Wanazi na Wafashisti Nchini Italia

Huenda Ukapenda Pia

Maonyesho Jijini Tel Aviv Yaonyesha Mambo Ambayo Mashahidi wa Yehova Walikabili Wakati wa Utawala wa Nazi

Mji wa Austria Wawakumbuka Mashahidi wa Yehova 31 Ambao ni Waathirika wa Utawala wa Nazi

Bamba la Kuwakumbuka Mashahidi Waliouawa na Wanazi Lazinduliwa Nchini Hungaria

Waokokaji wa Kambi ya Auschwitz Waadhimisha Miaka 70 Tangu Kuachiliwa Huru, Mashahidi wa Yehova Wakiwa Miongoni Mwao

Video Fupi: Jehovah’s Witnesses Stand Firm Against Nazi Assault

Kwa Nini Mashahidi wa Yehova Hawaendi Vitani?

Uzinduzi wa Jiwe la Msingi la Kumbukumbu ya Mashahidi wa Yehova Walioteswa na Wanazi na Wafashisti Nchini Italia

Huenda Ukapenda Pia

Chagua Lugha Yako

Shiriki