JUNI 27, 2019
ITALIA

Madaktari Katika Makongamano Mawili Makubwa ya Kitiba Nchini Italia Wapendezwa na Matibabu Yasiyohusisha Damu

CHEZA

Wataalamu wa kitiba watembelea kibanda chetu katika kongamano la SIAARTI lililofanyiwa Palermo

Madaktari wengi wameonyesha kwamba wanathamini mfumo wa ulimwenguni pote unaotumiwa na tengenezo letu ili kuandaa habari kuhusu mbinu za matibabu na za upasuaji zisizohusisha kutiwa damu mishipani. Idara ya Huduma za Habari za Hospitali (Italia), katika ofisi ya tawi iliyoko Rome, ni sehemu ya mfumo huo wa ulimwenguni pote. Mwishoni mwa mwaka uliopita, wawakilishi wa Idara ya Huduma za Habari za Hospitali (Italia) na washiriki wa Halmashauri ya Uhusiano na Hospitali walisimamisha kibanda cha maonyesho katika Kongamano la Kitaifa la Shirika la Italia la Nusu-kaputi, Kupunguza Maumivu, Kusaidia Kupumua, na Kushughulikia Wagonjwa Mahututi (SIAARTI), lililofanywa kuanzia Oktoba 10 hadi 13, 2018, huko Palermo, Sicily. Baada tu ya kongamano hilo, ndugu pia walishiriki maonyesho katika Kongamano la Mashirika ya Kisayansi ya Upasuaji lililofanyiwa huko Rome katika Kituo cha Kusanyiko cha “La Nuvola.”

Makongamano kama hayo yanaandaa fursa za kutoa habari za karibuni zaidi za matibabu yasiyohusisha damu kwa wataalamu wengi wa kitiba wanaopendezwa kwa wakati uleule. Kongamano la Palermo lilihudhuriwa na madaktari 2,800 wa nusu-kaputi. Kongamano la Rome, ambalo linaonwa kuwa kongamano kubwa zaidi kuhusu upasuaji kuwahi kufanywa nchini Italia, lilihudhuriwa na madaktari wa upasuaji 3,500. Wawakilishi kutoka taasisi mbalimbali zinazoheshimiwa pia walihudhuria. Walitia ndani washiriki kutoka mashirika yote ya madaktari wa upasuaji na kutoka Chuo cha Marekani cha Madaktari wa Upasuaji Kitengo cha Italia. Taasisi za kitaifa kama Wizara ya Afya, zilifadhili tukio hilo.

Daktari wa nusu-kaputi, Vincenzo Scuderi, kutoka Hospitali ya Policlinico iliyoko Catania, Sicily, alitembelea kibanda chetu cha maonyesho katika kongamano la Palermo. Januari 18, 2019, alimfanyia upasuaji wa dharura mgonjwa Shahidi ambaye mshipa wake mkubwa wa damu moyoni ulipasuka. Alifaulu kumaliza upasuaji huo tata bila kutumia damu. Dakt. Scuderi anaeleza hivi: “[Kibanda chenu cha maonyesho] katika Kongamano la SIAARTI la 2018 kilinisaidia sana kufanikiwa katika upasuaji huo. Habari nilizopewa hapo zilinisaidia sana.”

Kwa sasa, madaktari zaidi ya 5,000 nchini Italia wamekubali kuwatibu wagonjwa ambao ni Mashahidi wa Yehova kwa kutumia mbinu salama na zinazofaa za kitiba na za upasuaji ambazo hazihusishi kutia damu mishipani. Kila mwaka nchini Italia, Mashahidi 16,000 hivi wanatibiwa kwa njia hiyo.

Baada ya kongamano, madaktari wa nusu-kaputi na wa upasuaji walieleza maoni yao kuhusu kushughulika na Mashahidi wa Yehova.

“Kwa miaka mingi nimewatibu Mashahidi wa Yehova. Kwa miaka michache iliyopita, kikundi kilichoshughulikia hati ya kukataa kutiwa damu mishipani cha SIAARTI Study Group on Bioethics kimefanya kazi kutoa miongozo kwa madaktari wa nusu-kaputi, na kuwawezesha kushughulika kwa njia ileile na upasuaji tata na hali zinazohusisha nusu-kaputi kuhusu uchunguzi wa magonjwa na kuwepo kwa magonjwa kadhaa wakati uleule. Hati hiyo inaeleza waziwazi kwamba ‘haki ya kujifanyia uamuzi hasa kuhusiana na masuala ya afya ni haki ya msingi inayoandaliwa na Katiba (Kifungu cha 2, 13, na 32), Azimio la Haki za Kibinadamu Ulimwenguni, Kongamano la Oviedo Convention, na Katiba ya Haki za Msingi za Muungano wa Ulaya.’”—Antonio Corcione, mkurugenzi wa kituo cha kupandikiza viungo wa eneo la Campania, na msimamizi wa nusu-kaputi na kitengo cha wagonjwa mahututi katika Hospitali ya Monaldi, rais wa zamani wa Shirika la Italia la Nusu-kaputi, Kupunguza Maumivu, Kusaidia Kupumua, na Kushughulikia Wagonjwa Mahututi (SIAARTI)

“Kushughulika na Mashahidi wa Yehova kumenichochea mimi na wote ninaofanya kazi nao kuboresha mbinu za kuokoa damu na za kushughulikia wagonjwa baada ya upasuaji ili kupunguza uhitaji wa kuwatia watu damu mishipani. Mbali na kuwasaidia watu fulani ambao hawakutaka kutiwa damu, ujuzi huo umetuwezesha kuepuka kuwatia damu wagonjwa wengine wengi ambao walikuwa tayari kutiwa damu.”—Ugo Boggi, profesa wa upasuaji katika Chuo Kikuu cha Pisa (Italia), profesa msaidizi wa upasuaji katika Chuo Kikuu cha Pittsburgh (Marekani), rais mteule wa Shirika la Italia la Kupandikiza Viungo (SITO)

“Kupandikiza ini ndio upandikizaji tata zaidi. Ni tata mara mbili, tatu, au nne zaidi kuliko upandikizaji mwingine, na kuna hatari kubwa ya kuvuja damu nyingi. Licha ya hayo yote, kwa sababu tuna uthibitisho wa kisayansi kutoka maelfu ya visa ulimwenguni pote, tunaweza kusema kwamba tunajua jinsi ya kuushughulikia. Kwa kweli, kuna mbinu zilizothibitishwa kuwa zinafanya kazi ili kuepusha kuvuja damu. Tunajua jinsi ya kuepuka kutia damu mishipani. Upasuaji mwingi wa ini, kutia ndani kupandikiza, unafanywa bila kuongeza damu. Upasuaji huo unahusisha damu mara chache sana kwa sababu tumeacha kutumia mbinu iliyotumiwa miaka michache iliyopita ambayo haikulenga mshipa hususa, sasa tunaweza kuchunguza kila mshipa wa damu. Ningependa kuwashukuru Mashahidi wa Yehova kwa sababu wamefungua njia ya kuvumbua kitu ambacho hatukushughulikia sana miaka 10 au 15 iliyopita—suala la kuokoa damu.”—Umberto Cillo, profesa wa upasuaji na msimamizi wa kitengo cha upandikizaji wa kifuko cha nyongo, mirija ya nyongo, na ini katika Chuo Kikuu cha Padua, rais wa Shirika la Italia la Kupandikiza Viungo (SITO)

“Ninathamini sana kuwa na wagonjwa ambao ni Mashahidi kwa sababu wana imani isiyotikisika katika mafundisho yao. Na hiyo ndiyo sababu kwa miaka mingi nimejaribu sikuzote kufanya mabadiliko yanayohitajiwa ili kuwapendeza. Ninawaona kuwa wanastahili heshima kubwa sana. Mashahidi wa Yehova si watu wanaotaka kufa au kuwa wafia-imani; ni watu wanaotafuta matibabu bora kabisa.”—Francesco Corcione, profesa wa upasuaji katika Chuo Kikuu cha Naples Federico II, rais mstaafu wa Shirika la Italia la Upasuaji (SIC), mwanachama mheshimiwa wa Chuo cha Académie Nationale de Chirurgie, Paris, Ufaransa

“Kushughulika na Mashahidi wa Yehova kumenithibitishia zaidi kwamba kuna uhitaji wa kuheshimu sana imani za kitamaduni na za kidini za wagonjwa. Nimehisi nikichochewa na sheria ya hivi karibuni nchini Italia Sheria ya 219 ya Desemba 2017 inayosema, ‘Maandalizi ya kuheshimu msimamo wa mgonjwa na kutoa taarifa mapema,’ ambayo yanasema ‘hakuna matibabu yoyote yatakayoanzishwa au kuendelezwa bila mtu kutoa idhini baada ya kupewa habari zote.’ Ikiwa daktari wa upasuaji atawasiliana na mgonjwa kwa ustadi, uhuru, na kuchukua kwa uzito mapendezi yake, bila shaka kutakuwa na manufaa kwa wote wawili kushiriki majukumu, kuongeza kiwango cha uhuru, na mwishowe kumpa matibabu ya kutosha na yanayofaa.”—Luca Ansaloni, msimamizi wa kitengo cha upasuaji kwa ujumla na wa dharura katika of Hospitali ya Bufalini iliyoko Cesena, rais wa Shirika la Italia la Upasuaji wa Physiopathology (SIFIPAC)

“Mashahidi wa Yehova wamechangia sana kuboreshwa kwa mbinu za matibabu zisizohusisha damu. Teknolojia mpya za upasuaji zinachangia sana kutekeleza mapendezi ya wagonjwa ambao kwa sababu za kidini wanakataa damu. Faida nyingine ni kwamba matibabu yasiyohusisha damu yanapotumiwa pesa kidogo zaidi zinatumika.”—Diego Piazza, rais wa Shirika la Kitiba la Catania, msimamizi wa upasuaji wa kansa katika Hospitali ya Garibaldi-Nesima ya Catania, rais wa zamani wa Shirika la Italia la Madaktari wa Upasuaji Hospitalini (ACOI)

“Matumizi mengi ya damu yamechangiwa na nadharia ya kwamba damu ‘haina madhara,’ inapatikana kwa urahisi, ni ya bei nafuu, inaweza kutumiwa wakati wowote kwa urahisi, na uwezekano wa kupata matokeo mazuri mara moja (kwa kuongezeka kwa kiwango cha hemoglobini)—ndio sababu inapenda kutumika duniani pote. Hata hivyo, uthibitisho kuhusu madhara yanayotokana na kutia damu, iwe ni chembe nyekundu au sehemu nyingine za damu, unaongezeka kila mwaka. Kwa kweli, uchunguzi mbalimbali umeonyesha kwamba wagonjwa wanaotiwa damu mishipani wanakuwa na matatizo kutokana nayo kuliko wagonjwa wasiotiwa damu na matokeo mabaya zaidi ni uwezekano wa kufa, matatizo ya kupumua (kiharusi, magonjwa ya ini , renal injury, damu inayoganda na kuziba mishipa, kuambukizwa magonjwa, mapafu kushindwa kufanya kazi), na kukaa hospitalini muda mrefu. Nafikiri kutibu wagonjwa ambao ni Mashahidi wa Yehova kwa zaidi ya miaka 50 kumewafanya madaktari watambue jinsi ya kuhifadhi damu na kufanya maendeleo katika upasuaji usiohusisha damu.”—Giandomenico Biancofiore, msimamizi wa kitengo cha upasuaji tata unaohusisha nusu-kaputi na kuwasaidia wagonjwa waanze kupumua tena baada ya upandikizaji katika Hospitali ya Chuo Kikuu cha Pisa, profesa msaidizi wa nusu-kaputi na kuwasaidia wagonjwa kupumua katika Chuo Kikuu cha Pisa

Huenda Ukapenda Pia

TAARIFA ZA HABARI

Mahojiano na Profesa Massimo P. Franchi

“Ninathamini kwamba nimekutana na Mashahidi wa Yehova katika taaluma yangu. Wamenifanya mimi nikiwa daktari anayetumia mbinu za kawaida za tiba, kuanza kuchunguza uwezekano na umuhimu wa kupunguza matumizi ya damu.”

TAARIFA ZA HABARI

Chuo Kikuu cha Padua Kimefanya Kongamano la Kihistoria la Kuzungumzia Maendeleo ya Matibabu Yasiyohusisha Damu

Kwa muda fulani, ilionekana kwamba kumtia mgonjwa damu mishipani hakuna madhara yoyote na ndiyo mbinu inayoweza kuokoa uhai wakati wa matatizo makubwa ya kiafya au wakati wa upasuaji tata. Lakini wasemaji wengi katika kongamano hilo walipinga wazo hilo.

TAARIFA ZA HABARI

https://cms-imgp.jw-cdn.org/img/p/702019160/univ/art/702019160_univ_sqr_xl.jpg

Mashahidi wa Yehova

Madaktari Katika Makongamano Mawili Makubwa ya Kitiba Nchini Italia Wapendezwa na Matibabu Yasiyohusisha Damu

Huenda Ukapenda Pia

Mahojiano na Profesa Massimo P. Franchi

Chuo Kikuu cha Padua Kimefanya Kongamano la Kihistoria la Kuzungumzia Maendeleo ya Matibabu Yasiyohusisha Damu

Madaktari Watano Nchini Kanada Wazungumzia Maendeleo Katika Tiba Isiyohusisha Damu

Kwa Nini Mashahidi wa Yehova Wanakataa Kutiwa Damu Mishipani?

Madaktari Katika Makongamano Mawili Makubwa ya Kitiba Nchini Italia Wapendezwa na Matibabu Yasiyohusisha Damu

Huenda Ukapenda Pia

Chagua Lugha Yako

Shiriki