ROMA—Kwa kutambua huduma nzuri ambayo Mashahidi wa Yehova wanatoa katika jamii, maofisa wa gereza katika mji wa Bollate, kilomita 15 kaskazini mwa Milan, wametenga chumba kimoja kikubwa kitumiwe tu na Mashahidi kama “Jumba la Ufalme,” au jengo la ibada.

Mkurugenzi wa gereza hilo, Dakt. Massimo Parisi, alieleza kwamba gereza la Bollate lilijengwa kwa madhumuni ya kuwarekebisha wafungwa tabia: “Mojawapo ya malengo yetu ni kuhakikisha watu wanapata tena tumaini, na ili wapate tumaini hilo, tunatumia njia mbalimbali. Hali ya kiroho ni muhimu sana ili kutimiza hilo.” Kwa miaka 13 sasa, Mashahidi wa Yehova wameruhusiwa kujifunza Biblia bila malipo pamoja na wafungwa. Dakt. Parisi anaeleza matokeo kwa kusema hivi: “Mashahidi wamekuwa wakishirikiana nasi kwa miaka mingi na jitihada zao za kutoa elimu ya Biblia zimekuwa na matokeo mazuri kwa baadhi ya wafungwa wetu. . . . Kwa sababu hiyo, tuliona litakuwa jambo zuri tukiandaa eneo kwa ajili ya Mashahidi ili walitumie kuwasaidia wafungwa wabadilike.” Katika pindi mbili ndani ya miezi michache iliyopita, wafungwa zaidi ya 100 walihudhuria mikutano hiyo ya Mashahidi.

Christian Di Blasio, msemaji wa Mashahidi wa Yehova nchini Italia, alisema hivi: “Tunashukuru sana kwamba maofisa wa gereza la Bollate walichukua hatua ya kutusaidia kufanikisha kazi yetu kwa kuandaa mahali hapa pa ibada ndani ya gereza. Tunatarajia kuendelea kushirikiana nao ili kuwasaidia wafungwa wanufaike na programu ya elimu ya Biblia itakayowawezesha kutimiza mahitaji yao ya kiroho.”

Wanahabari Wanaweza Kuwasiliana na:

David A. Semonian, Ofisi ya Habari za Umma, 1-718-560-5000

Italia: Christian Di Blasio, 39-06-872941