Wakiwa bado wanakabili ugonjwa wa virusi vya corona, ndugu na dada zetu katika baadhi ya maeneo ya Jamhuri ya Kidemokrasia ya Kongo na Jamhuri ya Kongo wamekumbwa na mafuriko na vita. Ofisi ya tawi ya Kongo (Kinshasa), inayosimamia kazi ya kuhubiri katika nchi hizo mbili, imefanya mipango ili ndugu zetu wapate chakula cha kimwili na kiroho. Ofisi ya tawi imeanzisha Halmashauri 57 za Kutoa Msaada (DRC), katika eneo lote la ofisi ili kutoa msaada huo. Kufikia sasa, ndugu na dada zaidi ya 90,000 wamepata chakula.

Katika Aprili 16 na 17, 2020, nyumba za wahubiri 139 ziliharibiwa baada ya mvua nyingi kusababisha mafuriko katika mikoa ya mashariki ya Jamhuri ya Kidemokrasia ya Kongo. Sasa wanaishi na ndugu na dada zao. Halmashauri za Kutoa Msaada inafanya mpango ili kuhakikisha kwamba ndugu na dada hao wanajengewa nyumba za muda na za kudumu.

Ndugu na dada wametoa michango yao ya hiari ili kusaidia kazi ya Halmashauri hizo. Katika eneo moja, wahubiri walikusanya kilogramu 700 za ndizi, kilogramu 400 za unga wa mahindi, na kilogramu 220 za muhogo na majani ya muhogo.

Kwa kuongezea, wahubiri 60 kutoka Kutaniko la Some 26 waliwakaribisha na kuishi na ndugu na dada 50 waliokimbia mapigano. Wahubiri walishiriki pamoja na ndugu hao vyakula vyao mpaka Halmashauri za Kutoa Msaada zilipoweza kuleta chakula.

Kichwa cha familia moja katika eneo la Brazzaville, mji mkuu wa Jamhuri ya Kongo, alisema hivi baada ya kupata msaada: “Maisha yanaweza kubadilika haraka sana. Nilikuwa nafanya kazi na nilipata mshahara mzuri, pia mke wangu alifanya kazi zilizotuwezesha kwa pamoja kupata riziki. Corona ilipoanza kazi zetu ziliisha. Hata hivyo, tuliendelea kumtegemea Yehova. Tulipokuwa tunafanya mipango ya jinsi tutakavyopata mahitaji ikiwa yataisha, Yehova alitokeza njia iliyotusaidia.”

Dada Mbuyi Ester, mjane kutoka jiji la Kinshasa, alisema hivi pia: “Mume wangu alikufa mwezi mmoja uliopita, na nilikuwa na uhitaji mkubwa sana. Sikuwa na chanzo chochote cha kipato na nilikuwa na watoto watatu wa kutunza. Familia yangu isingeweza kupata chakula kingi hivyo kinachotosha kula kwa siku nyingi. Asante, Yehova!”

Tunasali kwamba Yehova ataendelea kuwatunza ndugu na dada zetu na atabariki kazi ya kutoa msaada. Tunatazamia pia kwa hamu wakati ambapo kila mtu atafurahia chakula kingi duniani.—Zaburi 72:16.