JANUARI 21, 2022
JAMHURI YA KIDEMOKRASIA YA KONGO
Ujenzi Umeanza wa Majengo Mapya ya Betheli ya Jamhuri ya Kidemokrasia ya Kongo
Ujenzi umeanza wa majengo mapya huko Lubumbashi, katika Jamhuri ya Kidemokrasia ya Kongo. Majengo hayo yatatumika yakiwa ofisi ya tawi. Mei 2022 inatarajiwa kwamba Wanabetheli 260 hivi wataanza kuhamia huko. Wanabetheli wengine 131 watabaki katika ofisi ya tawi ya sasa ya Kinshasa. a Pia ujenzi umeanza katika jengo la makazi na la ofisi karibu na ofisi ya tawi ya Kinshasa. Baadhi ya Wanabetheli 48 wameratibiwa kuingia katika jengo hilo jipya muda fulani baada ya Januari 2024. Majengo yote mawili yatasaidia utendaji wa kitheokrasi unaozidi kuongezeka nchini Kongo.
Ujenzi ukiendelea katika mojawapo ya majengo mapya matatu ya ofisi
Katika mwaka wa utumishi wa 2021, ndugu zetu katika Jamhuri ya Kidemokrasia ya Kongo waliongoza zaidi ya mafunzo 250,000 ya Biblia. Zaidi ya watu milioni moja walihudhuria Ukumbusho wa kifo cha Kristo. Kwa sasa, kuna Wanabetheli 394 katika ofisi ya tawi ya Kinshasa.
Kwa kuwa haikupatana na akili kupanua jengo lililoko Kinshasa, akina ndugu walitafuta uwanja katika majiji mengine. Walipata eneo linalofaa huko Lubumbashi ambapo wangeweza kujenga ofisi mpya ya tawi na pia majengo mengine wakati ujao.
Kushoto: Wanabetheli 300 hivi watahamia makazi mpya ya Lubumbashi. Kulia: Mwonekano wa mradi uliokamilika
Eneo la Lubumbashi liko kilomita 2,300 kutoka Kinshasa. Lina ukubwa wa ekari 30 na lina majengo ya makazi, ofisi, depo, na sehemu inayoweza kutumiwa kwa makusudi mbalimbali kutia ndani kuwa chumba cha kulia chakula, na pia maeneo ya burudani.
Ujenzi ulianza Novemba 2020 lakini mradi huo ulikabili changamoto nyingi kwa sababu ya janga la COVID-19.
Ndugu Robert Elongo, mshiriki wa Halmashauri ya Tawi ya Kongo (Kinshasa) anaeleza hivi: “Mipaka ilifungwa. Hilo liliathiri sana kuwasili kwa vifaa vya ujenzi, na hilo lilivuruga sehemu ya mwanzoni ya mradi huo.”
Hata hivyo, Ndugu Elongo anasema, “Katika muda wa mwaka mmoja tu, tumejionea asilimia 40 ya sehemu ya mwanzoni ya mradi huo ikikamilishwa.”
Baraka za Yehova zimeonekana wazi katika mradi huo wa ujenzi. Tunasali kwamba ongezeko hili katika mali za Kristo kutatoa ushahidi katika jamii kuwahusu watu wa Yehova na kuliletea sifa jina la Yehova Mungu.—Mathayo 24:47.
a Ofisi ya tawi ya Jamhuri ya Kidemokrasia ya Kongo (Kinshasa) inasimamia utendaji wa kitheokrasi wa Jamhuri ya Kidemokrasia ya Kongo na Jamhuri ya Kongo.
