Oktoba 1, 2022, Ndugu Stephen Attoh, mshiriki wa Halmashauri ya Tawi ya Kamerun, alitoa Biblia Takatifu—Tafsiri ya Ulimwengu Mpya ya Kibasa (cha Kamerun) katika mfumo wa kielektroni. Biblia hiyo ilitolewa katika programu iliyorekodiwa mapema na baadaye kupeperushwa. Inatarajiwa kwamba nakala za Biblia zilizochapishwa zitapatikana kuanzia Aprili 2023. Hii ndiyo lugha ya kwanza kati ya lugha za asili za Kamerun kupata Biblia nzima iliyotafsiriwa na Mashahidi wa Yehova. Katika mwaka 2019, Mashahidi walitoa Maandiko ya Kigiriki ya Kikristo katika Kibasa (cha Kamerun).

Tafsiri za Biblia nzima katika Kibasa (cha Kamerun) zilikuwepo hata kabla ya kutolewa kwa Tafsiri ya Ulimwengu Mpya lakini tafsiri hizo hazikupatikana kwa urahisi, ziliuzwa bei ghali, na pia zilitumia maneno ya kale sana. Mtafsiri mmoja alisema hivi: “Kwa kuwa tumepata toleo hili jipya, itakuwa rahisi zaidi kwa watu wanaopendezwa kupata nakala yao wenyewe ya Biblia. Isitoshe, Biblia hii mpya inatumia lugha rahisi na ya kisasa inayoeleweka vizuri.”

Tunashangilia kwamba ndugu na dada zetu wanaozungumza Kibasa (cha Kamerun) sasa wana Tafsiri ya Ulimwengu Mpya ikiwa nzima ambayo wanaweza kutumia katika funzo la kibinafsi na katika huduma wanapoendelea kutafuta watu wanaostahili.​—Mathayo 10:11.