ALMATY, Kazakhstan—Mei 2, 2017, mahakama ya Astana, mji mkuu wa Kazakhstan, ilimhukumu Teymur Akhmedov kifungo cha miaka mitano gerezani kwa sababu ya kazi yake ya kufundisha watu Biblia kwa amani. Mahakama inasema kwamba kazi hiyo “inachochea mgawanyiko wa kidini” na “kuonyesha kwamba wananchi fulani ni bora kuliko wengine kwa msingi wa dini zao.” Pamoja na kifungo hicho, hakimu pia amepiga marufuku utendaji wa kidini wa Bw. Akhmedov wa kuwafundisha wengine Biblia. Uamuzi huo unamwathiri sana Bw. Akhmedov, mwenye umri wa miaka 61, ambaye ni mume na baba ya watoto watatu, kwa sababu anahitaji kutibiwa uvimbe unaovuja damu na amekatazwa kupata matibabu anayohitaji. Bw. Akhmedov atakata rufaa. Huenda rufaa yake itasikilizwa mwishoni mwa Mei au mwanzoni mwa Juni.

Uamuzi huo ni wa karibuni zaidi kati ya matukio yenye kusikitisha ya kisheria yaliyoanza Januari 18, 2017, wakati Kamati ya Usalama wa Taifa ya Kazakhstan ilipomkamata na kumshitaki Bw. Akhmedov kwa kutumia Kifungu cha 174(2) cha Sheria ya Makosa ya Uhalifu ya Kazakhstan. Kisha Bw. Akhmedov alizuiliwa kwa miezi kadhaa na kukatazwa kupata matibabu. David A. Semonian, msemaji wa makao makuu wa Mashahidi, alisema hivi: “Mashahidi wa Yehova ulimwenguni pote wanahangaikia sana afya ya Teymur. Tunatumaini kwamba wenye mamlaka watapuuza mashtaka hayo na kumruhusu Mkristo huyo mshikamanifu na anayetii sheria aungane tena na familia yake na kupata matibabu anayohitaji haraka sana.”

Mashahidi wa Yehova wanayaona matendo ya mahakama ya Astana kuwa uthibitisho kwamba Kazakhstan inaiga kielelezo cha Urusi cha unyanyasaji wa kidini, hasa uamuzi wa hivi karibuni wa Mahakama Kuu ya Urusi wa kupiga marufuku Kituo cha Usimamizi cha Mashahidi wa Yehova nchini Urusi. Bw. Semonian anaeleza hivi: “Kama ilivyokuwa kuhusiana na ibada yetu nchini Urusi, Teymur Akhmedov ameathiriwa na sheria iliyokusudiwa kulinda dhidi ya ugaidi ambayo inatumiwa vibaya kuhusiana na ibada yetu. Mashirika ya kimataifa, kama Kamati ya Haki za Kibinadamu ya Umoja wa Mataifa na Tume ya Marekani Kuhusu Uhuru wa Kidini Kote Duniani, yameiambia serikali ya Kazakhstan iache kutumia vibaya sheria hizo kunyanyasa watu wanaoabudu kwa amani.” Anamalizia kwa kusema hivi: “Tunawahangaikia waabudu wenzetu wote nchini Kazakhstan, ambao tunatumaini hawatashambuliwa kwa sababu walikuwa wakifanya kazi yao ya kuwafundisha watu Biblia, ambayo inawasaidia watu ulimwenguni pote. Tutafuatilia kesi hiyo kwa ukaribu.”

Wanahabari Wanaweza Kuwasiliana na:

David A. Semonian, Ofisi ya Habari za Umma, +1-845-524-3000

Kazakhstan: Bekzat Smagulov, +7-747-671-45-01