Kuanzia mwishoni mwa Aprili 2021, kumekuwa na vita vya wenyewe kwa wenyewe Kolombia. Hakuna Shahidi wa Yehova aliyeumizwa au kuuawa. Hata hivyo katika sehemu fulani imekuwa vigumu kupata chakula na mafuta. Ndugu zetu wanakabiliana na upungufu huu pamoja na changamoto zinazoletwa na ugonjwa wa corona.

Ili kuwasaidia ndugu na dada zetu, Halmashauri ya Tawi nchini Kolombia imeteua Halmashauri tano za Kutoa Msaada (DRC). Wanatoa msaada kwa kuzingatia miongozo ya kujilinda dhidi ya ugonjwa wa corona. Akina ndugu na dada katika eneo hilo wanasaidiana hasa kupata chakula. Wazee wa kutaniko pamoja na waangalizi wa mzunguko wanawasaidia wahubiri kiroho.

Ndugu Almond Winklaar, anayesaidia katika Halmashauri moja ya Kutoa Msaada, anasema hivi: “Tunakabiliana na hali ngumu sana. Ninamshukuru Yehova kwa kuwa ametenda haraka ili kuwatunza watumishi wake katika kipindi hiki cha taabu.”

Katika kutaniko la La Loma Arena, wahubiri 18 pamoja na familia zao, walipokea mahitaji yao ya chakula. Wenzi fulani ambao ni mapainia katika kutaniko hilo walisema hivi, “Tulifurahi sana tulipopewa mahitaji hayo na Halmashauri ya Kutoa Msaada. Tuliona hili lilikuwa jibu kwa sala zetu. Tunashukuru familia yetu ya kiroho kwa kutupa kile tunachohitaji, na tunamshukuru Yehova kwa kutupatia nguvu na uvumilivu.”

Wafanyakazi katika duka moja kubwa ambapo walinunua bidhaa hizo, walivutiwa sana na jitihada hizo za kutoa msaada. Mmoja wa wafanyakazi hao alisema hivi: “Nilijua kwamba Mashahidi wa Yehova wanatutembelea nyumbani na kutuletea ujumbe wa Neno la Mungu, lakini hii kazi mnayofanya ya kuwasaidia watu walio na uhitaji zaidi, imenivutia sana.”

Licha ya changamoto wanazokabiliana nazo, ndugu zetu wanadumisha ratiba yao ya kiroho. Tunajua kwamba Yehova ataendelea kuwategemeza ndugu zetu kimwili na kiroho wanapoendelea wakiwa “si sehemu ya ulimwengu.”—Yohana 17:16.