Aprili 7, 2021, Mahakama ya Kikatiba ya Kolombia ilitoa hukumu yake katika kesi inayohusu suala la kitiba kumhusu Shahidi wa Yehova ambaye ni kijana aliyefanya maamuzi kama wa mtu mkomavu na mahakama ikatambua kwamba ana haki ya kufanya maamuzi yake mwenyewe ya kitiba. Katika kisa hiki, mgonjwa huyo aliomba tiba ya badala ambayo haingehusisha kutiwa damu mishipani. Mahakama hiyo ya Kikatiba ilitambua uzito wa kadi ya mamlaka ya kudumu ya uwakilishi ambayo imetiwa sahihi na kijana yeyote mkomavu na kwamba wazazi wa kijana anayehusika hawatakuwa wamepuuza matibabu ya mtoto wao.

Mei 27, 2020, Dada Daniela Caicedo, ambaye alikuwa na umri wa miaka 16 aligunduliwa kuwa na ugonjwa wa kansa ya damu inayoitwa B-cell acute lymphoblastic leukemia. Madaktari walitaka kumtia damu mishipani walipokuwa wakimfanyia matibabu ya kemikali (chemotherapy.) Licha ya kwamba alikuwa dhaifu, Daniela aliwaeleza madaktari kwa heshima kwamba alikataa kutiwa damu mishipani kwa sababu ya imani yake inayotegemea Biblia.—Matendo 15:29.

Juni 24, 2020, Taasisi ya Mambo ya Familia ya Kolombia (ICBF) iliwapa madaktari ruhusa kumtia damu mishipani Daniela licha ya kwamba alikataa. Pia, ICBF iliomba kwamba afanyiwe uchunguzi wa kisaikolojia. Wakati wa uchunguzi huo, dada yetu alionyesha kwamba alikuwa na ukomavu wa kiakili na kihisia wa kuamua ni aina gani ya matibabu ambayo angekubali kupokea. Pia, uchunguzi huo ulionyesha kwamba Daniela hakukataa kutiwa damu mishipani kwa sababu alilazimishwa, bali alikataa kwa sababu ya imani yake.

Mahakama ya chini ilimuunga mkono akiwa kijana mkomavu na kutetea haki yake ya kukataa kutiwa damu mishipani. Hata hivyo, mahakama ya rufaa iliamua kwamba ikiwa daktari wake alihisi anahitaji kutiwa damu mishipani, wanaweza kufanya hivyo. Kwa msaada wa wazazi wake, Daniela aliamua kukata rufaa kwenye Mahakama ya Kikatiba ili kutetea haki yake ya kukataa kutiwa damu mishipani.

Katika uamuzi wake wa mwisho, Mahakama ya Kikatiba ilitetea haki ya Daniela kwa kutambua kwamba uhuru wa kidini “unalinda uhusiano wa kibinafsi na Mungu pamoja na mambo yote yanayohusika kudumisha uhusiano huo.” Kwa kuongezea, ilisema kwamba kumlazimisha Daniela kutiwa damu mishipani kungeharibu amani yake pamoja na Mungu, na hivyo kuenda kinyume na haki yake ya kuabudu na pia kungemfedhehesha. Uamuzi huo pia ulitambua haki yake ya kupata matibabu yanayokubalika kutia ndani matibabu ya badala yasiyohusisha damu.

Uamuzi huu muhimu unathibitisha wajibu wa madaktari wa kuheshimu haki za Mashahidi vijana wakomavu ya kupokea matibabu kulingana na imani yao. Mmoja kati ya mawakili ambao walishughulikia kesi hiyo alisema hivi: “Mahakama ya Kikatiba inatambua haki ya msingi ya vijana wakomavu ya kuishi ambayo ni sawasawa na hadhi ya mtu. Kwa sababu hii, kijana mkomavu hawezi kufurahia maisha yenye hadhi, ikiwa imani yake ya kidini haiheshimiwi, hata ingawa mahakimu na madaktari si wa imani hiyo.”

Baada ya kusikia uamuzi wa Mahakama ya Kikatiba, Daniela alisema hivi: “Kinachonifurahisha zaidi ni kwamba jina la Yehova linatukuzwa. Kilichotokea kimenifundisha kwamba Yehova anaweza kubadili jaribu lolote na kulifanya kuwa nafasi ya kumwonyesha jinsi tunavyompenda.”

Afya ya Daniela ni nzuri sasa, na anaendelea kupokea matibabu mazuri sana. Atahudhuria shule ya mapainia mwezi Agosti 2021. Tunajua kwamba Mungu wetu, Yehova, anafurahi sana anapoona vijana wakimheshimu kupitia mwenendo wao.—Zaburi 148:12, 13.