Ukarabati wa jengo la makazi lililojengwa miaka 30 iliyopita katika ofisi ya tawi ya Korea ulikamilika Aprili 30, 2023. Ukarabati ulifanywa katika chumba cha kulia chakula na katika vyumba 62 vya makazi. Lengo lilikuwa kuyafanya majengo yatumie nishati kidogo zaidi, ili yawe salama na yenye kustarehesha zaidi kwa familia ya Betheli. Ndugu na dada 71 kati ya watu 170 waliojitolea kufanya kazi hiyo hawakuwa wameshiriki katika mradi mwingine wa ujenzi wa kitheokrasi kabla ya hapo. Walitumia mazoezi waliyopewa na walipomaliza ukarabati wa Betheli ya Korea, zaidi ya wajitoleaji 40 walipendekezwa kushiriki katika miradi mingine ya ujenzi wa kitheokrasi katika nchi nyingine.

Dada Kim Ha-yeon alisema: “Kwa sababu ya mazoezi mazuri niliyopata kwenye mradi wa ukarabati wa ofisi ya tawi ya Korea, sasa ninafurahi ninaweza kutumia ustadi niliopata katika mradi wa ujenzi nchini Indonesia.”

Ndugu Lee Myong-Hoon, ambaye alishiriki pia katika kazi ya ukarabati wa ofisi ya tawi ya Korea alisema hivi: “Nimepata ustadi mwingi kwa kushiriki mradi huo. Mgawo wangu ulikuwa mgumu, lakini miongozo ya usalama na mafunzo yanayoandaliwa na tengenezo yalifanya iwe rahisi kuutekeleza.” Leo, Ndugu Lee anafurahia kushiriki mradi wa ujenzi nchini Filipino.

Tunashangilia kwamba ukarabati uliokuwa ukifanywa katika ofisi ya tawi ya Korea umekamilika. Tunapofikiria jitihada zote za wajitoleaji walioshiriki mradi huo, kutia ndani wale ambao sasa wana migawo mingine ya kitheokrasi, tunatoa shukrani kwa ‘kazi yao ngumu ya upendo na ya uaminifu.’​—1 Wathesalonike 1:3.