Januari 7, 2024, Biblia—Habari Njema Kulingana na Mathayo ilitolewa katika Kitandroy, Kitankarana, na Kivezo. Programu ya pekee ilifanywa nchini Madagaska katika eneo ambalo lugha hususa inazungumzwa. Wahudhuriaji walipewa nakala zilizochapishwa za Biblia hiyo. Pia, nakala za kielektroni zilipatikana mtandaoni tayari kupakuliwa.

Ndugu Paul Rahajanirina ambaye ni mshiriki wa Halmashauri ya Tawi ya Madagaska alitoa Biblia—Habari Njema Kulingana na Mathayo ya Kitandroy katika Jumba la Ufalme lililo kwenye mji wa Ambovombe. Kulikuwa na wahudhuriaji 442. Kwa kuongezea, wengine 681 waliunganishwa kupitia video mtandaoni. Kwa sasa, kuna ndugu na dada 662 wanaotumikia katika makutaniko na vikundi 25 vya Kitandroy nchini Madagaska.

Ndugu Rolland Rafalibera ambaye ni mshiriki wa Halmashauri ya Tawi alitoa Biblia—Habari Njema Kulingana na Mathayo ya Kitankarana. Biblia hii ilitangazwa katika programu ya pekee iliyofanyiwa kwenye Jumba la Makusanyiko lililo Antsiranana. Jumla ya ndugu na dada 904 walihudhuria programu hiyo ana kwa ana, na wengine 1,218 waliunganishwa kupitia video mtandaoni. Zaidi ya ndugu na dada 1,000 wanatumikia katika makutaniko na vikundi 28 vya Kitankarana nchini Madagaska.

Biblia—Habari Njema Kulingana na Mathayo ya Kivezo ilitolea na Ndugu Christopher Thomas ambaye ni mshiriki wa Halmashauri ya Tawi katika programu ya pekee iliyofanywa kwenye Jumba la Ufalme lililo Toliara. Ndugu na dada 1,290 hivi walihudhuria mkutano huo ana kwa ana na wengine 305 waliunganishwa kupitia video mtandaoni. Kwa ujumla, ndugu na dada 706 wanatumikia katika makutaniko na vikundi 20 vya Kivezo nchini Madagaska.

Ingawa programu hizo zilifanywa katika maeneo tofauti, ndugu na dada zetu katika maeneo hayo matatu walieleza furaha waliyopata na kushukuru sana kwa kupokea tafsiri ya kitabu cha Mathayo iliyo wazi, sahihi, na inayoeleweka katika lugha zao wenyewe.

Tunamshukuru Yehova kwamba ndugu zetu wanaozungumza Kitandroy, Kitankarana, na Kivezo nchini Madagaska wamepokea tafsiri hii mpya ya Biblia ambayo itawasaidia kumsifu Yehova na kutimiza uhitaji wao wa kiroho.​—Mathayo 5:3.