Mike Jalal na Natali Sa’ad ni washiriki wa kikundi kidogo cha Kikristo cha Mashahidi wa Yehova katika Maeneo ya Palestina. Ingawa walifunga ndoa kisheria, hawawezi kupata cheti cha ndoa. Ni hivi karibuni tu baada ya jitihada nyingi kufanywa ndipo walifanikiwa kupata cheti cha kuzaliwa cha mwana wao mdogo, Andrae. Si wenzi hao wa ndoa tu wanaotaabika, wenzi wengine wa ndoa ambao ni Mashahidi wanakabili tatizo hilo pia. Kuwa kuwa Mashahidi wanashirikiana na dini ambayo haitambuliki kisheria katika Maeneo ya Palestina, wenye mamlaka wanawanyima haki zao za msingi za kujisajili kisheria.

Mike Jalal na Natali Sa’ad walifungishwa ndoa na mhudumu wa Mashahidi wa Yehova nchini Israeli. Hata hivyo, Wizara ya Mambo ya Ndani katika Maeneo ya Palestina imekataa kuitambua ndoa hiyo kwa sababu Mashahidi wa Yehova si dini inayotambulika kisheria katika eneo hilo. Kwa kuwa maofisa hawaitambui ndoa hiyo, watoto wowote wanaozaliwa kutoka kwenye muungano huo wanaonwa kuwa haramu, hivyo, Wizara ya Mambo ya Ndani imekataa kuwasajili. Wenzi hao wa ndoa na wazazi wengine ambao ni Mashahidi wamejaribu kutafuta suluhisho la ukosefu huo wa haki.

Katika mwaka wa 2014, Wizara ya Mambo ya Ndani ilikubali maombi ya kuwasajili watoto. Mike Jalal na Natali Sa’ad wanafurahi kwamba Andrae (aliyezaliwa Januari 30, 2012) hatimaye alipata utambulisho wa kisheria. Wazazi wa Maya Jasmin, Laura, na Cristian, wanaoonekana kwenye picha hapo juu, wamefurahi pia kwa kuwa Wizara ya Mambo ya Ndani imewapa watoto wao vyeti vya kuzaliwa, ikiwatambua kuwa “Wakristo.”

Sasa watoto hao wana vyeti vya utambulisho na wanafurahia haki kama raia wengine. Wazazi wao wanaweza kusafiri nao nje ya nchi bila kupata shida yoyote na wanaweza kuwaandikisha shule.

Licha ya maendeleo yaliyofanywa, wenye mamlaka bado wanaendelea kuwanyima vyeti vya ndoa Mike Jalal na Natali Sa’ad na wenzi saba wengine wa ndoa ambao ni Mashahidi wa Yehova. Jambo hilo limefanya wabaguliwe katika jamii kwa kuwa watu wanaowaona kuwa hawajaoana na eti wanaishi pamoja katika uhusiano usio wa kimaadili.

Kwa kuwa serikali haiwatambui wenzi hao wa ndoa, kila mmoja katika ndoa analazimika kutoa kodi ya mapato na kumiliki akaunti binafsi. Matibabu ya dharura yanapohitajika, mwenzi mmoja wa ndoa hatambuliki kuwa ana haki ya kumchagulia mwenzake aina ya matibabu. Ikiwa mwenzi mmoja anakufa, mwenzi yule mwingine na watoto hawawezi kurithi mali za aliyekufa. Watu wa familia hawawezi kumzika mpendwa wao kulingana na imani za Kikristo. Wanapaswa kuwazika kwenye eneo la makaburi ya Waislamu lililotengwa kwa ajili ya watu wasio Waislamu.

Septemba 2010, Mashahidi wa Yehova walipeleka maombi kwa ajili ya kutambuliwa kisheria kwa wenye mamlaka katika Maeneo ya Palestina. Baada ya kuona kwamba miaka zaidi ya miwili imepita bila kujibiwa maombi yao, walituma maombi katika Mahakama Kuu ya Ramallah. Mahakama iliyakataa maombi yao Oktoba 2013 kwa sababu ya kasoro fulani ndogo ya kisheria.

Kuanzia wakati huo, Mashahidi wamechukua hatua nyingine za kisheria na kuonana na maofisa ili kusuluhisha tatizo hilo. Hata hivyo, kukosa ushirikiano wa maofisa hao, kumezuia kupatikana kwa matokeo yoyote.

Philip Brumley, mshauri mkuu wa Mashahidi wa Yehova katika mambo ya kisheria, alieleza hivi: “Mashahidi wamekuwako jijini Ramallah na katika eneo hilo kwa zaidi ya miaka 100. Wanathamini sana wenye mamlaka kwa kuwaruhusu kufurahia uhuru wa kuabudu kwa amani. Hata hivyo, ubaguzi wa kidini unaowazuia Mashahidi wa Yehova kutambulika kisheria haupaswi kusababisha wakose haki zao za msingi za kibinadamu.”

Mashahidi wa Yehova wanawashukuru wenye mamlaka nchini Palestina kwa kuchukua hatua nzuri kuboresha haki ya kutambulika kwa kutoa vyeti vya kuzaliwa. Wenzi wa ndoa ambao kwa sasa hawana vyeti vya ndoa wanatumaini kwamba wenye mamlaka watawawezesha kujisajili kisheria katika mambo ya kibinafsi na hatimaye kuisajili pia dini yao.