Halmashauri ya Tawi Nchini Malawi imepanga kwamba mikutano ya kutaniko ipeperushwe kwenye vituo vya televisheni na redio. Programu hizo zinawafikia watu ambao si Mashahidi wa Yehova pia. Kuna zaidi ya Mashahidi 100,000 wa Yehova nchini Malawi, lakini wasimamizi wa vituo wanakadiria kwamba kila mwisho-juma watu milioni mbili hutazama programu hiyo kwenye televisheni na watu milioni nane huisikiliza kwenye redio.

Kama ilivyo katika nchi nyingine nyingi, kwa sasa ndugu zetu nchini Malawi hawakutani katika Majumba ya Ufalme kwa sababu ya ugonjwa wa virusi vya corona. Karibu wahubiri wote wana televisheni au redio. Kwa sababu hiyo, programu hiyo huwasaidia wale ambao hawawezi kugharimia huduma ya Intaneti au ambao hawawezi kukutana kupitia programu ya video iliyounganishwa kwenye mtandao, kunufaika na mikutano ya kutaniko.

Mikutano hiyo hutumia lugha ya Chichewa, ambayo ndiyo lugha kuu nchini humo. Programu yote kwenye TV hutafsiriwa wakati uleule katika Lugha ya Ishara ya Malawi. Mbali na hotuba, mkutano wa watu wote huonyesha video au drama ya usomaji wa Biblia. Mwishoni mwa programu, watazamaji na wasikilizaji hutiwa moyo watembelee jw.org ili kupata habari zaidi katika lugha nyingine.

Programu hizo zimesahihisha maoni yasiyo sahihi ambayo watu fulani walikuwa nayo kuwahusu Mashahidi wa Yehova. Mwanamume mmoja aliandika hivi: “Kwa majuma kadhaa yaliyopita, nimesikiliza mahubiri yenu kwenye redio. Yanajibu kwa njia yenye kuridhisha uwongo ambao watu wamekuwa wakieneza kuwahusu. Mahubiri yenu ni tofauti kabisa na ya dini nyingine kwa sababu yanagusa moyo!” Mwanamume huyo na familia yake wameanza kujifunza Biblia na Mashahidi wa Yehova.

Augustine Semo, anayeratibu kazi ya Dawati la Habari za Umma nchini Malawi, anaeleza hivi: “Programu hizo zimewasaidia sana akina ndugu kudumisha ratiba yao ya kiroho. Pia, zimewasaidia watu wengi ambao si Mashahidi kufahamu mafundisho yetu yanayotegemea Biblia. Hali nchini Malawi zitakaporudi kama kawaida, tunatumaini kuwaona wapya wengi wakijiunga nasi kwenye Jumba la Ufalme.”

Tunafurahi kujua kwamba Mashahidi wenzetu pamoja na watu wengine nchini Malawi wanalishwa kiroho katika nyakati hizi ngumu. Uthamini wetu kwa ‘mtumwa mwaminifu’ unaongezeka, kwa kuwa amehakikisha wote wanaweza kupata chakula cha kiroho.—Mathayo 24:45.