Septemba 25, 2021, Biblia—Injili Kulingana na Mathayo ilitolewa katika lugha ya Hmong katika mfumo wa kielektroni. Ndugu Geoffrey Jackson, mshiriki wa Baraza Linaloongoza alitoa kitabu hicho cha Biblia kwenye mkutano wa pekee uliofanywa kupitia mtandao na kupeperushwa ulimwenguni pote kwa wasikilizaji zaidi ya 2,500.

Hicho ndicho kitabu cha kwanza cha Biblia Takatifu—Tafsiri ya Ulimwengu Mpya kutolewa katika lugha ya Hmong. Watu zaidi ya milioni 3.9 ulimwenguni pote wanazungumza lugha hiyo. a Watu wa Hmong wanaabudu vitu vya asili na wanaamini kwamba ulimwengu unaongozwa na roho wazuri na wabaya.

Katika miaka ya 1970, watu wengi wanaozungumza lugha ya Hmong walikimbilia kambi za wakimbizi nchini Thailand. Mwishowe, wengi walihamia Ulaya; idadi kubwa walihamia Marekani.

Leo, watu wa jamii ya Hmong nchini Marekani wanaishi hasa katika majimbo ya California, Minnesota, na Wisconsin. Mashahidi wa Yehova walianza kutafsiri katika lugha ya Hmong mwaka wa 2007. Mwaka wa 2012, ofisi ya utafsiri ilianzishwa katika jiji la Sacramento, California.

Kikundi cha kutafsiri kilikamilisha kazi ya kutafsiri kitabu cha Mathayo katika miezi mitatu. Walisaidiwa na wakaguzi wa chapa kutoka nchi tano tofauti.

Kikundi hicho cha watafsiri kililazimika kukabiliana na changamoto isiyo ya kawaida wakati wa mradi huo. Lugha ya Hmong, ambayo ilianza kuandikwa baada ya mwaka wa 1950, haina muundo hususa wa herufi za kawaida na herufi kubwa.

Tafsiri za Biblia za lugha ya Hmong zilianza kupatikana kwa mara ya kwanza katika miaka ya 1980 lakini watu wengi wanaozungumza lugha hiyo hawakuweza kununua Biblia hizo za bei ghali. Pia, tafsiri hizo zilikuwa na makosa kadhaa ambayo yamewazuia watu kupata uelewaji sahihi wa Maandiko. Kwa mfano, tafsiri moja ya Biblia ilibadili jina la Mungu, Yehova, na jina linalopatikana katika hekaya ya lugha ya Hmong.

Mtafsiri mmoja alisema hivi: “Sasa kwa kuwa tuna Tafsiri ya Ulimwengu Mpya katika lugha ya Hmong, watu wenye mioyo minyoofu wataweza kusoma jina la Yehova katika nakala zao wenyewe za Biblia na wataweza kuwa rafiki zake. Tumekuwa tukisubiri na kusali kwa ajili ya hilo kwa miaka mingi sana.”

Wasomaji wameshukuru sana kwa ubora wa tafsiri hiyo. Msomaji mmoja alisema hivi: “Niliposoma kitabu cha Mathayo katika lugha ya Hmong, nilistaajabu. Nilijiuliza, ‘Inawezekanaje kwamba tafsiri hii inachochea hisia nyingi sana ndani yangu?’ Niliweza kuona masimulizi hayo yakiwa wazi kabisa akilini mwangu.”

Kutolewa kwa kitabu cha Mathayo katika lugha ya Hmong ni kikumbusho chenye nguvu kwamba Mungu wetu ambaye hana ubaguzi atafanya Neno lake lipatikane na wote wanaomtafuta.—Matendo 10:34, 35.