Makusanyiko ya eneo yaliyofanywa uso kwa uso yalisimamishwa mwezi wa Machi 2020 kwa sababu ya janga la COVID-19. Mwaka huu, zaidi ya Makusanyiko ya Eneo 6,000 ya “Iweni na Subira”! yatafanywa ulimwenguni pote katika lugha zaidi ya 500. Kusanyiko la kwanza lilifanywa Mei 12 hadi 14, 2023.

Dada Khrystine Torres alikuwa miongoni mwa watu 1,800 waliohudhuria kusanyiko la eneo kwenye Jumba la Kusanyiko la Mashahidi wa Yehova la Newburgh, jijini New York, Marekani. Alisema hivi: “Mwenyekiti aliposema: ‘Karibuni,’ kila mtu katika jumba hilo alipiga makofi kwelikweli. Watu wote walifurahia kuwa pamoja.” Ndugu Duane Smith, ambaye pia alihudhuria, alisema hivi: “Watu walikuwa wamesisimka sana. Ilikuwa wazi kwamba ndugu na dada walifurahi kuwa pamoja.”

Dada Jessica Dolcemascolo, ambaye alibatizwa wakati wa janga, hakuwa amewahi kuhudhuria kusanyiko uso kwa uso. Alieleza jinsi alivyohisi: “Shangwe, upendo, na furaha ya kuwa pale ilikuwa kama kumwona rafiki yangu mpendwa baada ya kumkosa kwa muda mrefu.” Dada mwenye umri wa miaka kumi na minane anayeitwa Noemi Tinajero, ambaye alibatizwa mapema mwaka huu, alisema: “Unakutana na familia zenye furaha, marafiki wenye furaha. . . . Ni kana kwamba tuko katika ulimwengu mpya.”

Wengi waliguswa moyo na kichwa cha programu hiyo. Ndugu Sam Huh alisema: “Kuwa na subira ni jambo ambalo wengi wetu hushindwa kufanya. Kwa hiyo, hicho kilikuwa kikumbusho muhimu kwamba tunahitaji kuiga kielelezo cha subira ya Yehova.” Dada Frenchie Smith alisema hivi: “Kusanyiko hili limenionyesha jinsi subira ilivyo muhimu katika maisha yetu. Programu yote ilikuwa yenye manufaa sana.”

Wote waliokuwa na pendeleo la kuhudhuria kusanyiko la kwanza lililofanyika Newburgh, New York walitiwa moyo sana! Sote tunatazamia kwa hamu kunufaika hivi karibuni kutokana na karamu hii ya kiroho iliyotayarishwa.​—Zaburi 122:1.