Novemba 23, 2023, Mary M. Larimer alikufa. Mary alihitimu katika darasa la kwanza la Chuo cha Biblia cha Gileadi cha Watchtower. a Mary alizaliwa Juni 4, 1920 katika eneo la Scenery Hill lililo Pennsylvania, Marekani. Alibatizwa mwaka 1935 akiwa na umri wa miaka 15 katika kusanyiko lililofanywa Washington, D.C., Marekani. Baada ya miaka minne, Dada Larimer alianza upainia na katika muda mfupi tu alijulikana kuwa painia mwenye bidii.

Katika Desemba 1942, Ndugu Nathan Knorr, aliyekuwa akiongoza katika tengenezo alimpa Mary mwaliko wa kuhudhuria shule iliyoitwa Chuo cha Biblia cha Gileadi cha Watchtower. Mwaliko huo ulisema hivi kwa sehemu: “Kusudi la chuo hiki ni kuwatayarisha wahudumu wanaume na wanawake kwa ajili ya kazi ya umishonari inayofanywa ulimwenguni pote. . . . Kila darasa litafanywa kwa muda wa miezi mitano . . . Itabidi mtu awe na bidii, asoma kinagaubaga na kutia jitihada ili kukamilisha masomo katika muda mfupi uliowekwa.” Mary alijaza fomu iliyoambatanishwa mara moja na kuituma.

Februari 1, 1943, Mary aliungana na wanafunzi wenzake 99 katika siku ya kwanza ya shule hiyo mpya iliyofanywa South Lansing, New York, Marekani. Katika mtaala wote wa karibu miezi mitano, Mary alijifunza Maandiko kwa bidii sana. Alikuwa mwanafunzi mzuri na akahitimu Juni 23, 1943.

Baada ya kuhitimu, Mary alipewa mgawo wa kuwa mmishonari nchini Kuba. Akisumulia baadhi ya changamoto za mgawo wake mpya, alisema hivi: “Kule, watu walikuwa maskini. Tulitembea kwa miguu katika huduma . . . Hatukuwa na magari.” Mary aliendelea na mgawo wake hadi mwaka wa 1948, aliporudi Pennsylvania kumtunza mama yake ambaye alikuwa amejeruhiwa sana. Kwa miaka mingi iliyofuata, Mary alibaki mseja, alikuwa na mengi ya kufanya katika huduma na utendaji mwingine wa kiroho. Alikuwa akitumikia katika kutaniko la Glendale, California, Marekani mpaka alipokufa.

Leo, Shule ya Gileadi iko Patterson, New York, na hivi sasa darasa la 155 linaendelea. Ndugu Mark Noumair, mwalimu wa Shule ya Gileadi aliposikia kuhusu kifo cha Dada Mary, alisema hivi: “Mary Larimer alikuwa msichana kutoka katika mji mdogo aliyekuwa tayari kwenda nchi ya kigeni ili kuwaambia watu kumhusu Yehova. Hakujua atatumwa wapi wala ikiwa atarudi. Wamishonari waliotoka Gileadi ni kama Mary, wamesaidia kuweka msingi wa ukuzi wa kazi ya kuhubiri ulimwenguni pote.”​—Isaya 6:8.