Januari 2019, maonyesho ya makao makuu yalifunguliwa rasmi katika Lugha ya Ishara ya Marekani (ASL). Enrique Ford, ambaye ni mwangalizi wa Idara ya Makumbusho, anaeleza hivi: “Kazi kubwa imefanywa ili kutafsiri maonyesho hayo katika lugha ya ishara ya Marekani na kuingiza programu yenye habari kuhusu maonyesho katika kompyuta! Sasa ndugu na dada viziwi na wale wenye uwezo mdogo wa kusikia ambao wanatembelea maonyesho yetu wanaweza kunufaika kikamili na mambo yanayofundishwa hapo.”

Ana Barrios, ambaye ni kiziwi na painia wa kawaida jijini New York, alikuwa kati ya watu wa kwanza kutembelea maonyesho hayo katika Lugha ya Ishara ya Marekani. Alisema hivi: “Nilisisimuka sana nilipotumia kifaa chenye habari kuhusu matembezi katika Lugha ya Ishara ya Marekani! Ingawa awali nilikuwa nimetembelea maonyesho hayo, habari zilizomo hazikuwa zimegusa moyo wangu kwa sababu sikuwa nimeelewa kikamili habari hususa kwa kusoma habari zilizofafanua picha. Baada ya kutazama video kadhaa za Lugha ya Ishara ya Marekani, nilianza kuelewa jina la Yehova kwa njia ambayo sikuwahi kuelewa mapema. Maonyesho hayo yalitaja sifa za utu wa Yehova ambazo ziligusa hisia zangu hadi nikaanza kutokwa na machozi!”

Mradi huo wa maonyesho katika lugha hiyo ulianza Juni 2017. Jumla ya ndugu na dada 23, kutia ndani viziwi 6 na wahubiri 6 wanaosikia ambao walilelewa na wazazi viziwi, walisaidia kazi ya kutafsiri na kutayarisha maonyesho hayo katika Lugha ya Ishara ya Marekani. Kikundi hicho cha kutafsiri kilitokeza video zaidi ya 900, maonyesho ya saa tisa hivi, ili maonyesho yapatane na rekodi za sauti zilizopo. Kazi ya kurekodi habari za matembezi katika Lugha ya Ishara ya Marekani ilifanywa kwenye maeneo matatu: Ofisi ya Kutafsiri ya Lugha ya Ishara ya Marekani iliyoko Fort Lauderdale, Florida; majengo ya ofisi ya tawi ya Marekani iliyoko Wallkill, New York; na ofisi za makao makuu zilizo Warwick, New York. Kabla ya kutoa video hizo rasmi katika Lugha ya Ishara ya Marekani, ndugu na dada viziwi wenye umri na malezi tofauti walizikagua na kusaidia kuboresha tafsiri yenyewe na ubora wa kazi iliyotokezwa.

Idara hiyo ilinunua vifaa viwili vinavyoweza kutokeza habari katika Lugha ya Ishara ya Marekani kama vile vinavyotumiwa katika rekodi za sauti za maonyesho ya Warwick. Idara hiyo pia iliingiza video hizo za Lugha ya Ishara ya Marekani katika skrini 14 kubwa.

Mark Sanderson, mshiriki wa Baraza Linaloongoza la Mashahidi wa Yehova, anasema hivi: “Kusudi la maonyesho ya Warwick ni kutia moyo na kuimarisha imani ya wote wanaotembelea makao makuu. Tunafurahi sana kwamba habari za maonyesho zinapatikana katika lugha 14, kutia ndani Lugha ya Ishara ya Marekani kwa ajili ya ndugu na dada na watu wanaopendezwa ambao ni viziwi na wale wenye matatizo ya kusikia.”

Kufikia sasa, wageni zaidi ya nusu milioni wametembelea Warwick. Ndugu ulimwenguni pote wanakaribishwa kufika na kujionea maonyesho hayo na kujifunza mengi zaidi kuhusu urithi wa kiroho wa Mashahidi wa Yehova. Wote wanaofanya hivyo, watatiwa moyo kuendelea ‘kumtumaini Mungu.’—Zaburi 78:7.