Februari 11, 2024, mechi ya mwisho ya mpira wa Marekani inayoitwa Super Bowl ilichezwa Las Vegas, Nevada, nchini Marekani. Juma moja kabla ya mashindano hayo inakadiriwa kwamba watu 300,000 walitembelea eneo hilo. Vigari vya machapisho viliwekwa katika maeneo 50 tofauti-tofauti yenye idadi kubwa ya watu katika jiji la Las Vegas Boulevard, moja kati ya majiji yenye shughuli nyingi. Machapisho yanayotegemea Biblia yalipatikana katika lugha tisa. Ndugu na dada 1,500 hivi walishiriki katika kampeni hiyo ya pekee ya kuhubiri habari njema. Yafuatayo ni baadhi ya mambo ambayo ndugu na dada zetu walijionea wakati wa kampeni hiyo.

Mwanamume mmoja alipita karibu na kigari cha machapisho kilichokuwa na swali “Je, Dunia Yetu Itaokoka?” Alirudi haraka na kuwakaribia Mashahidi waliokuwa wamesimama karibu na kigari. Alikuwa na wasiwasi kuhusu hali za sasa za ulimwengu na alifurahi sana kusikia ahadi ya Biblia kuhusu amani, inayopatikana kwenye Yeremia 29:11. Alitumia zaidi ya saa moja akizungumza na akina ndugu waliokuwa kwenye kigari hicho cha machapisho. Kabla ya kuondoka, mwanamume huyo alieleza pia kuhusu tamaa yake ya kuanza kuhudhuria mikutano.

Katika eneo lingine karibu na uwanja wa michezo, mlinzi mmoja aliona bango kwenye kigari chetu cha machapisho ambacho kilikuwa na swali lilelile “Je, Dunia Yetu Itaokoka?” Kwa kuwa bado alikuwa kwenye zamu, aliwaeleza akina ndugu kuwa angerudi hapo baada ya muda wa zamu yake kwisha. Baada ya muda mfupi kupita, alifika na akaeleza kwamba hivi karibuni alikuwa ameanza kujisomea Biblia yeye mwenyewe. Baada ya kuelezwa na akina ndugu kuhusu programu yetu ya kujifunza Biblia, alitamani kujifunza mengi zaidi. Mipango ilifanywa ili ndugu mmoja awasiliane naye.

Siku moja kabla ya mashindano hayo kuanza, tulikutana na mwanamke mmoja tulipokuwa tukihubiri nyumba kwa nyumba. Alieleza kwamba aliona ripoti kwenye televisheni kuhusu vigari vyetu vya machapisho. Alisema hivi: “Mnafanya kazi kubwa sana. Katika nyakati hizi ngumu tunahitaji ujumbe huo wa tumaini.” Kisha mwanamke huyo akauliza kuhusu wakati na mahali ambapo Mashahidi wa Yehova hukutana kwa ajili ya ibada.

Tunafurahi kwamba watu wanaendelea kuikubali ‘hekima inayopaza sauti’ katika maeneo ya umma kupitia jitihada hizi za pekee za kutoa ushahidi, kwa sifa na utukufu wa Mungu wetu, Yehova.​—Methali 1:20, 21.