Mike Iwuchukwu alimsikia binti yake, Melody, akishuka ngazi huku akikimbia wakati wa chakula cha mchana. Alikuwa amemaliza kipindi cha asubuhi cha masomo ya shule kupitia mtandao. Aliamua kuchunguza kwa nini binti yake alikuwa akikimbia hivyo. Alitarajia kumkuta akila au akicheza. Alichoona kilimshangaza.

Mike anasema hivi: “Alikuwa ameketi mbele ya kompyuta yake akiwa na nakala ya kitabu Masomo Unayoweza Kujifunza Katika Biblia, na wanafunzi watatu walikuwa wakimsikiliza. Kisha Melody akaniambia: ‘Baba, ninaongoza funzo la Biblia!’”

Melody alikuwa ameazimia kuanzisha funzo la Biblia tangu Septemba 2020 wakati ambapo shule yao huko Houston, Texas, ilipoanza kuwafundisha wanafunzi kupitia mtandao kwa sababu ya ugonjwa wa virusi vya corona. Kwa hiyo, alisali kwa Yehova na kutafuta nafasi za kuanzisha funzo.

Mike na mke wake, Octavia, walifurahi sana. Mike anasema: “Melody huzungumza na wanafunzi wenzake kumhusu Yehova kila wakati. Lakini mimi na mama yake tuliguswa moyo sana kumwona akiongoza funzo la Biblia.”

Melody anaendelea kujifunza kwa ukawaida na wanafunzi wenzake. Anaeleza hivi: “Kufikia sasa nimewafundisha kuhusu Paradiso na Yesu. Ningependa wawe Mashahidi wa Yehova!”

Samuel Molnar, mwenye umri wa miaka tisa, anayeishi Ingleside, Illinois, amekuwa pia akizungumza na wengine kuhusu imani yake.

Baada ya kusikia kuhusu ndugu ambaye alimhubiria jirani kupitia uzio, Samuel aliamua kujaribu kufanya hivyo. Alipomwona mjukuu wa jirani yao akicheza nyuma ya nyumba, alimuuliza mvulana huyo ikiwa angependa kusikia kuhusu Paradiso. Mvulana huyo alikubali na Samuel akakimbia kuchukua nakala yake ya Kitabu Changu cha Hadithi za Biblia.

Samuel anasema hivi: “Nilimwambia kwamba wakati ujao ataweza kucheza na wanyama bila kuumia. Kisha nikamsomea simulizi kumhusu Danieli ndani ya shimo la simba.”

Samuel hakuishia hapo. Alimwandikia mvulana huyo barua inayofafanua mazoezi na video zinazopatikana kwenye jw.org. Wavulana hao walikubaliana kwamba watasoma hadithi nyingine ya Biblia watakapoonana tena.

Samuel amefurahia matokeo aliyopata na anajitahidi sana kufikia lengo lake lifuatalo. Anasema hivi, “Ninataka kufahamu vizuri trakti zote zilizo katika Sanduku la Vifaa vya Kufundishia, ili niweze kuzitumia kuwafundisha wengine.”

Hivi karibuni, dada watatu huko Houston walitimiza mradi wao wa kiroho: kufanya upainia msaidizi wakati wa likizo.

Katika mwezi wa Agosti, Joselyn Horta, mwenye umri wa miaka 13; Melanie Alvarez, mwenye umri wa miaka 12; na Chloe Rodriguez, mwenye umri wa miaka 10, walikutana kupitia video iliyounganishwa kwenye mtandao ili kuandika barua. Walikutana mara tano hivi kwa juma wakianza saa moja hivi asubuhi.

Joselyn anaeleza hivi, “Tulizungumza na kula pamoja, kisha saa moja na nusu asubuhi tukaanza kuandika barua.” Mara kwa mara, mmoja kati yao angeshindwa kuamka mapema, kwa hiyo, wale wengine walimtumia ujumbe mfupi wa kirafiki uliosema: “Kumekucha! Amka! Tuanze kuhubiri!”

Mbali tu na kutiana moyo wao kwa wao, jitihada za wasichana hao zimewatia moyo marafiki na watu wa familia zao. Alicia, mama ya Joselyn anasema hivi: “Pindi fulani sikuhisi nina nguvu za kushiriki katika huduma ya shambani. Lakini nilipomwona Joselyn akihubiri pamoja na rafiki zake, nilijiambia, ‘Mimi pia ninataka kuhubiri!’”

Moyo wa Yehova unashangilia kuwaona vijana wote waaminifu wakijitahidi kadiri wawezavyo kushiriki katika huduma wakati huu wa ugonjwa wa corona.—Methali 27:11.