Oktoba 25, 2019, ilikuwa siku muhimu sana kwa ndugu na dada 6,500 wanaozungumza Kimaya. Ni siku ambayo Biblia Takatifu—Tafsiri ya Ulimwengu Mpya ya Kimaya ilitolewa. Ndugu Esteban Bunn mshiriki wa Halmashauri ya Tawi ya Amerika ya Kati alitangaza kutolewa kwa Biblia hii katika kusanyiko la eneo lililofanyika Mérida, Yucatán huko Mexico. Kusanyiko hilo lilifanyika katika Jumba la Kusanyiko la Mérida na kuunganishwa na uwanja wa michezo wa Poliforum Zamná ulio katika jiji hilohilo. Biblia hii itasaidia sana katika huduma, kwa kuwa inakadiriwa kwamba kuna jumla ya watu 762,000 wanaozungumza Kimaya nchini Mexico na Marekani.

Kabla ya hapo Tafsiri ya Ulimwengu Mpya ya Maandiko ya Kigiriki ya Kikristo ndiyo Biblia iliyopatikana katika Kimaya. Biblia hiyo ilitolewa Desemba 14, 2012. Tangu wakati huo, karibu nakala 29,000 za Biblia zimechapishwa.

Mtafsiri mmoja anasema hivi: “Kwa ujumla Wamaya wanaiheshimu sana Biblia na wanathamini mwongozo wake. Lakini wengi wao hawajapata fursa ya kujifunza kusoma na kuandika vizuri lugha hiyo. Hivyo tumejaribu kutumia maneno yaliyo wazi na yanayoeleweka katika lugha inayotumiwa kila siku na watu.”

Changamoto ya pekee ya kutafsiri Biblia katika Kimaya ilikuwa kuzingatia kwamba lugha hiyo ina lahaja mbalimbali. Tukiwa na wazo hilo, jalada la mbele la tafsiri hii mpya lina kichwa kilichorahisishwa, Biblia ich maya, ikimaanisha “Biblia Katika Kimaya.” Vilevile, kuna maelezo ya chini zaidi ya 6,000. Sehemu moja ya maelezo ya chini inaonyesha maana nyingine ya maneno yaliyo katika maandiko ili wasomaji wote wa lugha ya Maya waelewe kwa usahihi mistari fulani ya Biblia.

Kwa hakika, tafsiri hii mpya ni “chakula . . . kwa wakati unaofaa” na itawasaidia sana ndugu na dada wanaozungumza Kimaya wanapojifunza kibinafsi na katika huduma.—Mathayo 24:45