Oktoba 25, 2019, kwenye kusanyiko la eneo lililofanywa huko Chiapas, Mexico, katika ukumbi wa Poliforum of Tuxtla Gutiérrez, Ndugu Armando Ochoa, mshiriki wa Halmashauri ya Tawi ya Amerika ya Kati, alitangaza kutolewa kwa Biblia Takatifu—Tafsiri ya Ulimwengu Mpya katika Kitzotzil. Kusanyiko hilo liliunganishwa na ukumbi wa Centro de Convenciones kwa mfumo wa video. Kulikuwa na jumla ya wahudhuriaji 3,747.

Tafsiri ya Ulimwengu Mpya ya Maandiko ya Kigiriki ya Kikristo katika Kitzotzil ilitolewa Desemba 26, 2014, na imekuwa ikisambazwa kati ya watu wanaozungumza Kitzotzil, ambao hasa wanaishi milimani na maeneo yaliyo chini katika jimbo la Chiapas, Mexico. Kati ya wenyeji wa asili zaidi ya 16,000,000 nchini Mexico, karibu wenyeji 500,000 huzungumza Kitzotzil, kutia ndani wenyeji 2,814 ambao ni Mashahidi wa Yehova.

Watafsiri wa lugha ya Kitzotzil walikabili changamoto nyingi. Kwa mfano, machapisho machache sana ya kilimwengu yamechapishwa katika Kitzotzil na kuna kamusi chache tu. Vilevile, lugha hiyo ina lahaja za maeneo saba. Kwa hiyo, watafsiri walihitaji kuchagua kwa makini maneno ambayo yataeleweka kwa wasomaji wote wa Kitzotzil.

Mmoja wa watafsiri hao alisema: “Kwa kuwa Biblia hii inatumia jina la Mungu, Yehova, itawasaidia wasomaji wawe na uhusiano wa kibinafsi pamoja naye. Tafsiri nyingine mbili za Biblia ya Kitzotzil zilizopo zinatumia jina la Mungu mara moja tu kwenye maelezo ya chini katika kitabu cha Kutoka. Hii itakuwa Biblia ya kwanza ya Kitzotzil ambayo imerudisha jina la Mungu katika sehemu zote ambazo linafaa kuwapo.” Kwa kuongezea, mhubiri anayezungumza Kitzotzil alisema kwamba “tafsiri nyingine za Biblia ya Kitzotzil zinauzwa bei ghali sana. Ni watu wachache tu wanaoweza kuzinunua. Lakini Biblia hii itapatikana bila malipo kwa kila mtu.”

Bila shaka, Biblia hii iliyotolewa hivi karibuni itawanufaisha watu wanaozungumza Kitzotzil na ambao “wanatambua uhitaji wao wa kiroho.”—Mathayo 5:3.