Baraza Linaloongoza limeidhinisha mipango ya kuhamisha ofisi ya tawi ya Amerika ya Kati ambayo kwa sasa ipo karibu na Mexico City, nchini Mexico. Halmashauri ya Mradi wa Ujenzi yenye washiriki watano imeanzishwa ili kushughulikia mradi huo. Halmashauri hiyo imeshaanza kazi ya kutafuta sehemu itakayofaa kwa ajili ya ofisi mpya ya tawi.

Tangu mwaka wa 1974, ofisi ya tawi iliyopo imefanyiwa marekebisho na kupanuliwa mara kadhaa. Kuanzia mwaka wa 2011, kazi ya kitheokrasi inayofanywa Belize, Kosta Rika, El Salvador, Guatemala, Honduras, Nikaragua, na Panama imekuwa ikisimamiwa na ofisi ya tawi ya Amerika ya Kati. a Ili kukidhi mahitaji, ofisi iliyopo ingehitaji kupanuliwa na kuboreshwa sana. Hivyo basi, iliamuliwa kwamba itafaa zaidi kujenga ofisi mpya kwenye eneo lingine ili kutegemeza vizuri zaidi kazi katika ofisi ya tawi ya Amerika ya Kati inayozidi kupanuka na kuandaa mazingira mazuri zaidi kwa ajili ya kuendeleza kazi ya kuhubiri Ufalme.

Mradi huo wa kuhamisha ofisi ya tawi utafanywa katika hatua kadhaa. Hatua ya kwanza inatia ndani kununua eneo na kujenga majengo ya makao na ya kazi kwa ajili ya Wanabetheli 300. Hatua zinazofuata zitahusisha kujenga majengo mengine ya makao na ya kazi ambayo familia ya Betheli itahitaji.

Ndugu Joseph Yi, ambaye ni mshiriki wa Halmashauri ya Mradi wa Ujenzi anasema hivi: “Kwa sasa, tunashirikiana na washiriki wa Halmashauri ya Tawi ya Amerika ya Kati ili kuchagua jimbo moja nchini Mexico ambalo litafaa kujenga majengo yetu mapya ya ofisi ya tawi. Jambo moja litakaloathiri uamuzi wetu ni ikiwa maofisa na wenyeji wa jimbo fulani wanaitikia vizuri mradi wetu. Tunatazamia kwa hamu kuona jinsi Yehova atakavyoongoza jitihada zetu.”

Tumesisimka sana kuhusu mradi huu mpya wa kitheokrasi na tunasali Yehova aubariki.​—Methali 16:3.