Oktoba 1, 2023, Ndugu Carlito Dela Cruz, mshiriki wa Halmashauri ya Tawi ya Micronesia, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kichuuk. Tangazo hilo lilitolewa wakati wa mkutano wa pekee ambao ulihudhuriwa na watu 83, huko Chuuk, Micronesia. Watu wengine 435 waliunganishwa kupitia mtandao, kutia ndani wale walio katika makutaniko na vikundi vinavyozungumza Kichuuk nchini Guam na Marekani. Mara tu baada ya tangazo hilo kutolewa, toleo la kidijitali lilipatikana ili wote waweze kulipakua. Toleo lililochapishwa litakuwa tayari Januari 2024.

Kichuuk kinazungumzwa hasa katika visiwa vya Chuuk, vilivyo upande wa magharibi wa Bahari ya Pasifiki na ni sehemu ya Shirikisho la Majimbo ya Micronesia. Mashahidi wa Yehova walianza kutafsiri machapisho ya Biblia katika Kichuuk mnamo 1978. Leo, ndugu na dada 180 hivi wanatumikia katika makutaniko mawili ya Kichuuk kwenye visiwa vya Chuuk; kutaniko moja kwenye kisiwa cha Guam; na kutaniko moja, vikundi vitatu, na kikundi kimoja kidogo nchini Marekani.

Ingawa tafsiri nyingine za Biblia zinapatikana katika Kichuuk, tafsiri nyingi hazina jina la Mungu, Yehova. Tafsiri ya Ulimwengu Mpya ya Maandiko ya Kigiriki ya Kikristo imelirudisha jina la Mungu mahali panapofaa. Ndugu Dela Cruz alisema hivi: “Nina uhakika kwamba tafsiri hii ya Biblia itawasaidia watu wengi zaidi wanaozungumza Kichuuk kujifunza kuhusu jina la Yehova na pia kumkaribia.”

Tunashangilia kwamba Tafsiri ya Ulimwengu Mpya ya Maandiko ya Kigiriki ya Kikristo imetolewa katika Kichuuk, kwa kuwa itawasaidia watu wengi zaidi walio “na mwelekeo unaofaa kwa ajili ya uzima wa milele” kujifunza kumhusu Yehova.​—Matendo 13:48.