Aprili 30, 2023, Tafsiri ya Ulimwengu Mpya ya Maandiko ya Kigiriki ya Kikristo ilitolewa katika lugha ya Gitonga kwenye mkutano wa pekee uliofanywa Maxixe, Mkoa wa Inhambane, Msumbiji. Ndugu Wayne Wridgway, mshiriki wa Halmashauri ya Tawi ya Msumbiji, alitoa Biblia hiyo katika tukio hilo lililohudhuriwa na watu 920. Wale waliohudhuria walipokea nakala za Biblia zilizochapishwa. Isitoshe, Biblia hiyo ingeweza kupakuliwa kwenye mtandao.

Asili ya lugha ya Gitonga ni Mkoa wa Inhambane nchini Msumbiji. Wakazi wa eneo hilo wanajulikana kwa ukarimu wao na pia ukaribishaji wageni. Gitonga ni lugha ya mama ya watu wapatao 327,000 kutoka maeneo mbalimbali ya mkoa huo, yaani, Homoíne, Jangamo, Maxixe, na Morrumbene.

Kabla ya kupata Biblia hii wahubiri walitumia tafsiri mbalimbali za lugha ya Gitonga na ilikuwa vigumu kuzielewa. Ndugu na dada zetu wanafurahia kutolewa kwa tafsiri hii ambayo ni rahisi kuelewa. Mtafsiri mmoja alieleza hivi: “Baba mwenye upendo huwasiliana na watoto wake kwa maneno ya kawaida na rahisi. Tafsiri hii ya Biblia itawasaidia watu wanaozungumza Gitonga kuelewa mambo ambayo Baba yetu mwenye upendo Yehova, anasema.”

Alipokuwa akiitoa Biblia hiyo, Ndugu Wridgway alisema: “Tukitaka urafiki wa karibu na Mungu tunahitaji kuongea naye kila siku kupitia sala lakini pia tunahitaji kumsikiliza kila siku anaposema nasi kupitia Neno lake, Biblia. Tunakutia moyo uanze kusoma nakala yako ya Tafsiri ya Ulimwengu Mpya ya Maandiko ya Kigiriki ya Kikristo haraka iwezekanavyo na usitawishe zoea la kusoma Biblia kila siku.”

Tunashangilia pamoja na ndugu na dada zetu kwa sababu ya toleo hili na tunasali Yehova aendelee kubariki kazi ya kuhubiria watu wanaozungumza lugha ya Gitonga.​—Waroma 12:15.