Wafanyakazi wa hospitali huko Słupca, Poland, waliandika barua ya kuwashukuru ndugu zetu huko Warsaw baada ya kuwapelekea Biblia ambazo hospitali ilikuwa imeomba.

Hospitali hiyo inawatunza watu wengi walio na ugonjwa wa virusi vya corona (COVID-19). Mwakilishi wa wasimamizi wa hospitali hiyo alitaka kupata habari itakayowatia moyo na kuwasaidia wafanyakazi na wagonjwa wa hospitali hiyo. Akakumbuka kwamba mke wa rafiki yake, anayeitwa Helena Krupa ni Shahidi wa Yehova. Alikumbuka msisimko wake kuhusu Biblia na akawasiliana naye na kuomba ikiwa anaweza kupata Biblia kwa ajili ya hospitali hiyo.

Dada Helena Krupa anayeishi Warsaw, aliwajulisha wazee wa kutaniko lake kuhusu ombi hilo. Walitayarisha kifurushi fulani kwa ajili ya hospitali hiyo. Ndani yake kulikuwa na nakala sita za Biblia Takatifu—Tafsiri ya Ulimwengu Mpya iliyorekebishwa pamoja na machapisho mengine yanayotegemea Biblia. Pia ndugu hao waliandika barua inayoelezea sehemu za pekee za Tafsiri ya Ulimwengu Mpya. Walitaja hasa kwamba inatumia jina la Mungu, Yehova.

Wasimamizi wa hospitali hiyo waliandikia kutaniko hilo barua wakishukuru kwa msaada waliopata na kwamba ndugu hao walifanya yote wawezayo kushughulikia mahitaji ya wengine. Barua hiyo ilisema hivi pia: “Wakati huu ngumu ambapo kila mtu anaishi akiwa na mahangaiko—kuhusu uhai, afya, familia yao, wapendwa wao, na kazi yao—ninyi mna nguvu za kuwafikiria wengine . . . Kujua kwamba hatujaachwa peke yetu na matatizo yetu kulituimarisha tuendelee kupambana na ugonjwa huu na kukabiliana kwa mafanikio na changamoto tunazokabili tunapofanya kazi yetu.”

Maneno yaliyo katika barua hiyo ya shukrani yanaonyesha jinsi tunavyoweza kuandaa faraja na tumaini kupitia njia ambazo Yehova ameandaa.—Waroma 15:4.