Aprili 19, 2020, Biblia Takatifu—Tafsiri ya Ulimwengu Mpya ilitolewa katika Kirumania katika mkutano wa pekee huko Bucharest, Rumania. Ndugu Jon Brenca, mshiriki wa Halmashauri ya Tawi ya Rumania, alitoa Biblia hiyo kupitia video iliyounganishwa kwenye mtandao kwa makutaniko yote yanayozungumza Kirumania nchini Rumania na Moldova. Programu hiyo ilitafsiriwa pia katika Kihungaria, Kiromani (cha Rumania), na Lugha ya Ishara ya Rumania. Zaidi ya watu 69,000 walitazama programu hiyo.

Kazi hiyo ya kutafsiri Biblia ilichukua zaidi ya miaka mitatu kukamilika na ilifanywa na vikundi viwili. Tafsiri hiyo iliyorekebishwa inatumia lugha ya wazi na ya kawaida huku ikiwasilisha maana ya awali ya maandishi ya Biblia kwa usahihi. Mtafsiri mmoja alisema hivi: “Kutolewa kwa Tafsiri ya Ulimwengu Mpya, pamoja na lugha yake ya kisasa, kunaifanya iwe rahisi kusoma. . . . Kwa sababu hiyo, habari muhimu ya Biblia inaweza kugusa mioyo ya msomaji.”

Mshiriki mwingine wa kikundi cha tafsiri anasema hivi: “Kwa kuwa inatumia lugha ya wazi, mtu yeyote anaweza kujifunza hata iwe ana umri gani. Bila shaka, itawasaidia watu wote wanyoofu kumkaribia Yehova. Ni kitabu kilicho hai katika lugha iliyo hai.”

Kufikia sasa Biblia Takatifu—Tafsiri ya Ulimwengu Mpya imetafsiriwa ikiwa nzima au sehemu katika lugha 186, kutia ndani lugha 31 zilizorekebishwa kwa kutegemea toleo lililorekebishwa la 2013 la Kiingereza. Mashahidi wa Yehova zaidi ya 65,000 ulimwenguni pote ambao wanazungumza Kirumania watanufaika kikamili kutokana na tafsiri hii iliyorekebishwa.

Tukio hilo lenye shangwe ni uthibitisho wa baraka za Yehova kuelekea wale wanaompenda na wanaomtumikia kwa umoja.—Methali 10:22.