Agosti 26, 2023, Jumba la Kusanyiko la Turda, Rumania, pamoja na majengo matatu yaliyoongezwa kwenye majengo ya ofisi ya tawi ya Bucharest, Rumania, yaliwekwa wakfu wakati wa hotuba iliyotolewa na Ndugu Gage Fleegle, mshiriki wa Baraza Linaloongoza. Alitoa hotuba hiyo mbele ya watu 1,702 waliohudhuria kwenye Jumba hilo la Kusanyiko, na watu wengine 14,101 waliounganishwa kupitia mtandao.

Wakati wa programu ya kuwekwa wakfu, wahudhuriaji walisikiliza ripoti kuhusu historia ya kazi ya ujenzi wa kitheokrasi nchini Rumania na jinsi ambavyo Yehova amebariki jitihada hizo. Ndugu na dada walioshiriki katika vikundi mbalimbali vya ujenzi walihojiwa pia. Baada ya programu, Dada Iaela Drăghici, aliyesaidia katika ujenzi wa Jumba la Kusanyiko la Turda, alisema hivi: “Ninafurahi sana kuona majengo haya yakiwekwa wakfu kwa Yehova kwa kusudi la kumtukuza.” Ndugu Bruce Dyer, mjitoleaji wa ujenzi wa kimataifa ambaye alifanya kazi kwenye upanuzi wa ofisi ya tawi aliongezea kusema hivi: “Tunathamini sana pendeleo la pekee tulilopata kushiriki katika ujenzi huu. Tunamshukuru sana Yehova kwa fadhili zake zisizostahiliwa.”

Majengo hayo mapya ya ofisi ya tawi yanatia ndani darasa ambalo sasa linatumiwa kwa ajili ya Shule ya Waeneza-Injili wa Ufalme pamoja na majengo ya makazi kwa ajili ya familia ya Betheli. Pia, majengo hayo mapya yanatia ndani ofisi za utafsiri, Jumba la Ufalme, na mapokezi makuu ya ofisi hiyo ya tawi. Watu 1,200 wanaweza kuketi ndani ya Jumba hilo jipya la Kusanyiko lililowekwa wakfu, na watu 1,350 wanaweza kuketi nje. Jumba hilo linatumiwa na ndugu na dada 15,000 hivi kutoka sehemu mbalimbali nchini humo.

Siku iliyofuata, Agosti 27, kulikuwa na programu ya pekee katika uwanja wa michezo wa jiji la Cluj-Napoca. Jumla ya watu 23,968 walihudhuria uso kwa uso. Programu hiyo ilitafsiriwa katika Kiingereza, Kihungaria, Lugha ya Ishara ya Rumania, Kiromani (cha Rumania), Kirusi, Lugha ya Ishara ya Urusi, na Kiukrainia. Programu hiyo ilipeperushwa kwa makutaniko yote nchini Rumania na Ukrainia. Jumla ya watu 121,411 walihudhuria.

Tunashangilia pamoja na ndugu na dada zetu nchini Rumania kwamba majengo hayo sasa yamewekwa wakfu kwa Yehova na yataendelea kutegemeza ibada safi.​—Isaya 2:3.