Juni 2020, kulikuwa na mvua kubwa katika eneo la Rodna, Transylvania, nchini Rumania na kutokeza mafuriko. Kwa sababu hiyo, nyumba sita za ndugu zetu ziliharibiwa. Juni 27, 2020, mwangalizi wa mzunguko wa Rodna, akishirikiana na wazee wa makutaniko katika eneo hilo, alifanya mpango ili ndugu na dada 25 kutoka makutaniko ya karibu wafike haraka na kusaidia katika kazi ya kutoa msaada. a Meya wa Rodna aliona kazi ambayo ndugu zetu walifanya, na akawapongeza kupitia kituo cha habari cha eneo hilo.

Eneo la Rodna liko katika bonde lenye mito mingi. Mafuriko hayo yalileta uchafu mwingi kutoka katika mito hiyo, na hivyo kufanya iwe vigumu kuingia katika mji huo. Nyumba ya dada yetu mmoja ilikuwa katika sehemu ambayo meya wa Rodna na kikundi chake walipata shida kutoa matope na mabaki ya uchafu. Hivyo, ndugu zetu walipofika walisaidia kuondoa takataka hizo ili kusafisha nyumba ya dada yetu. Kazi yao ilisaidia kazi ya wenye mamlaka walipokuwa wanatoa msaada pia.

Baadaye, meya aliwapongeza ndugu hao katika mahojiano katika kituo cha televisheni. Alisema: “Ningependa kuwaeleza mfano wa pekee ambao umenigusa sana. . . .  Siku ya kwanza, tulitumia magari mawili makubwa kutoa takataka hizo, lakini hatukuweza kumaliza kazi hiyo—eneo hilo lilikuwa limeharibika sana. Siku iliyofuata, tulisaidiwa . . . na zaidi ya watu 30, wajitoleaji ambao ni Mashahidi wa Yehova. Jioni ilipofika, tulikuwa tumemaliza kazi. Watu hawa walisaidia kusafisha eneo hilo lote. Ninawashukuru wote!”

Pia, meya aliwaandikia ndugu hao ujumbe kwenye tovuti. Alisema: “Yehova aliye juu awabariki nyinyi nyote na awape maisha marefu, afya njema, na mafanikio maishani!”

Jambo hilo lililotokea Rumania ni mfano mwingine wa jinsi mwenendo wetu mzuri unavyomletea utukufu Baba yetu wa mbinguni, Yehova.—1 Petro 2:12.