Kuanzia Desemba 15 hadi 31, 2022, Mashahidi wa Yehova walishiriki kwa mara ya kwanza katika Maonyesho ya Kimataifa (FIDAK) yanayofanywa kila mwaka jijini Dakar nchini Senegal. Huu ni mwaka wa 30 tangu maadhimisho hayo yalipoanzishwa. Kwenye maonyesho hayo unaweza kupata sanaa mbalimbali, na huduma zinazotolewa kwa umma. Isitoshe, mambo ya kitamaduni pia yanaonyeshwa. Tukio hilo lilihudhuriwa na mamia ya maelfu ya wageni waliotoka sehemu mbalimbali za Afrika na duniani pote.

Ndugu na dada zetu walitayarisha banda ili kuonyesha watu baadhi ya habari zilizo kwenye jw.org na machapisho mbalimbali yanayohusu maisha ya familia. Wahubiri walionyesha watu video za Uwe Rafiki ya Yehova na Vibonzo Kwenye Ubao na pia mahojiano ya vijana kutoka kwenye mfululizo wa Vijana Wenzako Wanasema Nini.

Baadhi ya wageni hawakujua kuhusu tovuti yetu lakini walisaidiwa kuifungua kwenye simu zao wakiwa hapohapo kwenye banda. Watu wengi walishangaa kujua kwamba jw.org ina habari katika lugha zaidi ya 1,000 kutia ndani lugha ya Wolof inayotumiwa nchini humo. Wageni walioomba kupata machapisho walipewa, na kwa ujumla zaidi ya machapisho 3,000 yalitolewa.

Mgeni mmoja alisema hivi: “Kutembelea banda lenu kulikuwa sehemu muhimu zaidi ya ziara yetu kwenye maonyesho haya.” Mwingine alisema: “Ikiwa kungekuwa na zawadi kwa ajili ya banda bora kabisa, ninyi mngeishinda!”

Ndugu Martin Laud, aliyesaidia katika kazi ya kutayarisha banda hilo alisema: “Tulifurahi sana kukaribisha wageni wengi kutoka nchi mbalimbali. Wengi wao walitushukuru sana kwa sababu ya kutoa bila malipo habari zinazotegemea Biblia ambazo zinaweza kuwasaidia katika maisha yao ya kila siku.”

Tunafurahi kwamba tumepata matokeo mazuri kwa sababu ya kushiriki katika tukio hilo. Ni njia nyingine ambayo watu wa Yehova wanaendelea kutumia ili kushiriki na wengine “hekima inayotumika” inayopatikana katika Neno la Mungu.​—Methali 3:21, 22.