Maonyesho ya 66 ya Kimataifa ya Vitabu yalifanyika Belgrade, nchini Serbia, kuanzia Oktoba 21 hadi 29, 2023. Zaidi ya watu 190,000 walitembelea maonyesho hayo. Mashahidi wa Yehova walitayarisha banda la machapisho lililoangazia jinsi ya Neno la Mungu linavyoweza kuwanufaisha watu. Zaidi ya ndugu na dada 100 walikuwepo ili kuwasaidia wageni kupata majibu ya maswali muhimu katika Biblia.

Mwanamke mmoja alitembelea banda letu na kumweleza dada yetu kwamba ana maswali mengi kuhusu Biblia. Alifurahi sana kukutana na mtu ambaye anaweza kumsaidia kupata majibu ya maswali yake. Mipango ilifanywa ili kuendeleza mazungumzo hayo.

Kijana mmoja alipokea nakala ya broshua Uhai—Ulitokana na Muumba? Alisema kwamba ingawa anamwamini Mungu, alihisi kwamba simulizi la Biblia kuhusu uumbaji si rahisi kueleweka. Kwa mfano, alijiuliza ikiwa Biblia inafundisha kwamba Mungu aliumba kila kitu ndani ya siku sita zenye urefu wa saa 24. Alifurahi sana Mashahidi walipomwonyesha makala inayozungumzia swali hilo kwenye tovuti ya jw.org.

Wasichana wawili matineja walivutiwa na vitabu Maswali Ambayo Vijana Huuliza—Majibu Yafanyayo Kazi Buku la 1 na la 2. Walifurahi sana kugundua kwamba vitabu hivyo vinazungumzia mada muhimu kama vile, jinsi ya kupata marafiki wa kweli, jinsi ya kufanikiwa shuleni, na pia jinsi ya kutambua tofauti kati ya kuvutiwa kimahaba na upendo wa kweli. Mmoja kati yao alisema hivi kwa msisimuko: “Vitabu hivi ni vizuri sana. Hatutakosa kuvisoma!”

Tunawashukuru sana ndugu na dada zetu wa Belgrade kwa kufanya kazi kwa bidii katika maonyesho hayo ya vitabu. Yehova na aendelee kuwabariki kwa sababu ya jitihada zao za kuendelea ‘kulitangaza jina lake hadharani.’​—Waebrania 13:15.