Kuanzia Mei 17 hadi 26, 2024, zaidi ya ndugu na dada 600 kutoka Serbia na Montenegro walishiriki katika kampeni ya pekee ya kuhubiri katika maeneo ya mbali. Miaka 20 imepita tangu mara ya mwisho Mashahidi wa Yehova walipofanya kampeni kama hiyo ya ana kwa ana. Inakadiriwa kwamba zaidi ya watu milioni 1.5, yaani, karibu robo ya idadi ya watu wa Serbia wanaishi katika maeneo ya mbali ambapo ndugu zetu hawawezi kuwatembelea kwa ukawaida. Jambo la kupendeza ni kwamba, kulikuwa na watu zaidi ya 1,800 walioomba kujifunza Biblia wakati wa kampeni hiyo.

Katika mji wa Beli Potok, mwanamke mmoja aliyefurahia mazungumzo pamoja na Mashahidi, aliwapigia simu majirani wake kadhaa na kuwaambia: “Kuna watu watakaokuja kuwaeleza kumhusu Mungu na Biblia. Wasikilizeni kwa makini!” Mashahidi wa Yehova walipofikia nyumba ya mwisho katika kijiji hicho, mwenye nyumba aliwasalimu kwa shauku na kuwakaribisha ndani. Mwanamke huyo aliwaeleza kwamba amewahi kuhudhuria Ukumbusho wa kifo cha Yesu, naye akakubali kujifunza Biblia.

Katika mji wa Smederevska Palanka, Mashahidi wawili walikuwa kwenye kigari cha machapisho Radomir alipowafuata. Mwanamume huyo aliwaeleza jinsi alivyofurahi kuona watu wanaompenda Mungu katika mji huo. Kisha alitaka kujua mengi zaidi kuhusu kujifunza Biblia bila malipo kama bango lililo kwenye kigari lilivyosema. Ndugu hao walimweleza Radomir jinsi funzo la Biblia linavyofanywa, naye alikubali kujifunza.

Kampeni hiyo ya pekee ya kuhubiri ilileta shangwe iliyoje kwa ndugu na dada zetu walio Serbia pamoja na wale wote ambao wana kiu kwa ajili ya kweli za Biblia.​—Yohana 7:37.