Mei 27, 2023, Ndugu Jaroslav Sekela, mshiriki wa Halmashauri ya tawi ya Cheki, alitangaza kutolewa kwa Biblia—Kitabu cha Mathayo katika Kiromani (cha Mashariki mwa Slovakia). Kitabu hicho cha Biblia kilitolewa katika mkutano wa pekee uliofanywa katika mji wa Michalovce ulio mashariki mwa Slovakia. Wote waliohudhuria mkutano huo walipata nakala zilizochapishwa. Nakala za kielektroni pia zilipatikana.

Kiromani kina uhusiano na lugha kama vile Kibengali, Kihindi, na Kipunjabi. Maneno mengi ya Kiromani yametokana na lugha za maeneo mbalimbali ambapo Waromani wameishi. Kwa sababu hiyo, lahaja ya Kiromani cha mashariki mwa Slovakia, ina maneno tofauti-tofauti ikitegemea eneo ambalo lahaja hiyo inatumiwa. Watafsiri walizingatia mambo hayo yote walipokuwa wakitafsiri kitabu hiki cha Biblia.

Kuna tafsiri nyingine ya Biblia katika Kiromani (cha Mashariki mwa Slovakia), lakini tafsiri hiyo imeondoa jina la Mungu, Yehova, na badala yake kuweka maneno kama vile o Raj na o Del, ambayo yanamaanisha “Bwana” na “Mungu.” Isitoshe, baadhi ya mistari imetafsiriwa kwa njia ya ufafanuzi kwa hiyo si rahisi kwa msomaji kuelewa mawazo ya awali. Tafsiri yetu mpya ya kitabu cha Mathayo ina jina la Mungu, Yehova, na imetumia lugha inayoeleweka vizuri.

Mtafsiri ambaye alishiriki katika mradi huo anasema: “Inapohusu kutafsiri Biblia, ni muhimu sana kuhakikisha kwamba ujumbe wa Mungu unawasilishwa kwa usahihi ili watu wamjue na kumpenda.”

Mtafsiri mwingine alisema: “Waromani hubaguliwa mara nyingi, kwa hiyo andiko la Mathayo 10:31 linaweza kuwafariji sana. Linatukumbusha kwamba Yehova anawaona shore, ndege ambao hawakuthaminiwa na watu katika nyakati za Biblia. Sisi tuna thamani kwa Yehova kuliko shore wengi.”

Tuna uhakika kwamba tafsiri hii itawasaidia wasomaji wajifunze kumhusu Yehova na watambue kwamba anawapenda na anawajali.​—1 Petro 5:7.