Ndugu zetu walifanya kusanyiko la kwanza la eneo katika lugha ya Kiromani huko Slovakia, kuanzia Julai 20 hadi 21, 2019, kwenye uwanja wa michezo wa Winter Stadium huko Michalovce. Jumla ya watu 1,276 walihudhuria programu hiyo iliyofupishwa. Watu 19 walibatizwa.

Kati ya wahudhuriaji, kulikuwa na ndugu na dada kutoka nchi nne: Jamhuri ya Cheki, Ubelgiji, Uingereza, na Ukrainia. Jambo la kupendeza zaidi ni kwamba wahudhuriaji walifurahia kutazama sinema yenye kichwa, Simulizi la Yosia: Mpende Yehova; Chukia Mabaya, katika lugha yao ya asili.

Kusanyiko hilo lilifanywa miaka mitano tu baada ya kutaniko la kwanza la Kiromani kuanzishwa huko Slovakia mnamo Novemba 2014. Sasa kuna makutaniko 9 ya Kiromani, vikundi 10, na vijikundi 14 kwenye eneo la ofisi ya tawi ya Cheki.

Peter Tirpak, meneja wa uwanja wa Winter Stadium, alisema: “Tumefurahia sana ushirikiano tulioonyeshwa na Mashahidi wa Yehova. Sikuzote mnatimiza ahadi yenu. Tutafurahia ikiwa mtakuja tena.”

Peter Varga, aliyekuwa mwangalizi wa programu, alisema: “Sijawahi kuhudhuria kusanyiko zuri kama hili. Hili lilikuwa tukio muhimu sana katika historia ya kitheokrasi kwa ndugu na dada zetu wanaozungumza Kiromani. Baada ya wimbo wa mwisho, walianza kukumbatiana, ingawa hawakuwa wamekutana kabla ya hapo. Wengi wao walitokwa na machozi.”

Tunashangilia pamoja na wahubiri 1,010 wanaozungumza Kiromani huko Slovakia. Makusanyiko haya yanaonyesha upendo wa kweli wa kindugu kati ya watu wa Yehova.—Yohana 13:34, 35.