Desemba 18, 2021, toleo lililorekebishwa la Biblia Takatifu—Tafsiri ya Ulimwengu Mpya lilitolewa katika Kislovenia. Ndugu Gerrit Lösch, mshiriki wa Baraza Linaloongoza, alitoa Biblia hiyo katika programu iliyorekodiwa awali. Programu hiyo ilisikilizwa na wasikilizaji 2,000. Biblia ilitolewa kwa njia ya kielektroni na nakala zilizochapishwa zitapatikana mwaka 2022.

Biblia imepatikana katika lugha ya Kislovenia tangu 1584. Mwaka huo, Biblia ya Dalmatin ilitolewa. Hiyo ndiyo Biblia nzima ya kwanza katika Kislovenia. Leo ulimwenguni pote, kuna nakala 80 tu zinazojulikana za Biblia ya Dalmatin kutia ndani Biblia moja iliyo katika maonyesho ya Biblia kwenye Makao Makuu ya Mashahidi wa Yehova yaliyo Warwick, New York, U.S.A.

Mwaka wa 1925, Ndugu Franz Brand, Mwanafunzi wa Kimataifa wa Biblia, alianza kuwahubiria watu katika sehemu aliyofanya kazi yake ya kunyoa nywele iliyokuwa Maribor, Slovenia. Mwaka huo kikundi kidogo cha watu kilianza kukutana kwa ukawaida na kuzungumzia Maandiko. Mwaka wa 1930, Wanafunzi wa Biblia wa Slovenia walianzisha ofisi ya kutegemeza kazi ya elimu ya Biblia nchini humo. Katika mwaka wa 2009, ndugu zetu walifurahia tukio la pekee, Ndugu Samuel Herd, mshiriki wa Baraza Linaloongoza, alipotoa Tafsiri ya Ulimwengu Mpya katika kusanyiko la wilaya lililofanyiwa Ljubljana, Slovenia.

Katika Vita vya Pili vya Ulimwengu na miaka iliyofuata, Mashahidi wa Yehova nchini Slovenia waliteswa sana, kwanza waliteswa na Wanazi na kisha wenye mamlaka katika nchi hiyo. Katika kipindi hicho, baadhi ya ndugu zetu walifungwa gerezani na hata wengine wakauawa. Mwaka wa 1953 wenye mamlaka waliamua kuondoa marufuku dhidi ya Mashahidi wa Yehova na wakawaruhusu waabudu kwa uhuru. Leo, kuna wahubiri 1,757 nchini Slovenia.

Tuna uhakika ndugu na dada zetu nchini Slovenia watakubaliana na maneno aliyosema Ndugu Lösch katika programu ya kutoa Biblia: “Jifunze kutumia Biblia hii kwa ustadi, ili nguvu zake zionekane! . . . Kutolewa kwa toleo lililorekebishwa la Biblia Takatifu—Tafsiri ya Ulimwengu Mpya katika lugha ya Kislovenia kutakusaidia kufuata kikamili ‘neno la uaminifu’!”​—Tito 1:9.