Kama ilivyoripotiwa awali, Ndugu Rustamjon Norov, ambaye sasa ana miaka 22, aliachiliwa mapema kutoka gerezani nchini Tajikistan, mnamo Septemba 21, 2021, kwa sababu ya sheria ya msamaha iliyoanza kutumika mapema mwezi huo. Alikaa mahabusu jumla ya miezi mitatu. Mei 10, 2021, alihamishiwa gereza iliyo Yavan ili aendelee kutumikia kifungo cha miaka mitatu na nusu alichokuwa amehukumiwa. Wale waliomwona Rustamjon akiwa mahabusu, na pia kesi yake ilipokuwa ikisikilizwa, na hata alipofungwa gerezani, walivutiwa na mwenendo wake mzuri na utimilifu wake.

Pindi moja kesi ya Rustamjon ilipokuwa ikisikilizwa, kanali mmoja alimjia Rustamjon ili kumsalimia. Kanali huyo alimweleza Rustamjon jinsi alivyomheshimu kwa sababu ya ujasiri na uthabiti wake. Pia alimwambia: “Kila mtu anayemwamini Mungu anapaswa kuwa kama wewe.” Kisha akaongezea: “Hebu wazia, miaka mingi kutoka sasa, utumishi badala utakapokubaliwa nchini Tajikistan, jina lako litakuwa miongoni mwa wale ambao walijidhabihu ili raia wapate haki hii ya kisheria.”

Akiwa gerezani, Rustamjon aliendelea kutoa ushahidi mkubwa kwa wengine. Kwa sababu ya tabia yake nzuri, maofisa wa gereza walimwalika ashiriki katika masomo ya pekee yaliyofadhiliwa na Umoja wa Ulaya yanayokusudiwa kuwasaidia wafungwa kupata kazi wanapoachiliwa. Baada ya kumaliza mazoezi, wasimamizi wa gereza walimpa Rustamjon shahada na pia barua ya shukrani kwa sababu ya bidii yake. Rustamjon alieleza kwamba wenye mamlaka walisema mwenendo wake ulikuwa mzuri kwa sababu alitumia kanuni za Biblia.

Kabla ya kuachiliwa kutoka gerezani, Rustamjon hakuwa na uhakika ikiwa angeachiliwa kupitia sheria ya msamaha. Hata hivyo, wafungwa wengine walisema kwamba walikuwa na uhakika angeachiliwa kwa sababu alikuwa amejifanyia jina zuri gerezani. Maofisa wengi gerezani walimtia moyo.

Mashahidi vijana walio waaminifu kama Rustamjon, ambao wamefungwa kwa sababu hawaungi mkono upande wowote, na kwa sababu wanabaki watimilifu, ‘wanaangaza nuru yao mbele ya watu.’ Hata zaidi, ‘matendo yao mema’ yanamletea Yehova Mungu sifa na utukufu.​—Mathayo 5:16.