Maonyesho ya 22 ya vitabu ya Kimataifa ya Bangkok yalifanyika Bangkok, Thailand, kuanzia Machi 28 hadi Aprili 8, 2024. Tukio hilo lilifanyika kwenye Kituo cha Maonyesho cha Taifa cha Queen Sirikit na wageni milioni 2 hivi walitembelea maonyesho hayo. Ndugu zetu waliweka banda lenye machapisho yanayozungumzia ushauri unaopatikana katika Biblia kuhusu mada kama vile afya ya akili na jinsi ya kukabiliana na mkazo. Kwa kuongezea, ndugu na dada zetu walizungumza na watu wengi na 34 kati yao waliomba kujifunza Biblia.

Wakati wa mazungumzo hayo, mwanamume mmoja alieleza kwamba binti yake ana tatizo kubwa la kushuka moyo. Ndugu zetu walimwonyesha maandiko mbalimbali yanayopatikana kwenye gazeti la Mnara wa Mlinzi Na. 1 2023, lenye kichwa “Afya ya Akili—Msaada Kutoka Katika Biblia.” Akina ndugu pia walimsaidia mwanamume huyo kupata habari mbalimbali kwenye jw.org kuhusu maisha ya familia yenye furaha. Mwanamume huyo alishukuru sana kwa kupata ushauri huo kutoka katika Biblia na alisema kwamba anatamani kumwonyesha binti yake ushauri huo haraka iwezekanavyo.

Ofisa mmoja mwenye cheo cha juu serikalini, alitembelea banda letu na akazungumza kwa muda mrefu sana na mmoja kati ya ndugu zetu. Baada ya kutazama video kadhaa kutoka kwenye jw.org, ofisa huyo aliuliza maswali kuwahusu Mashahidi wa Yehova na pia kuhusu kazi yetu ya kufundisha watu Biblia. Kisha akaonaishara inayoonyesha kwamba mtu anaweza kujifunza Biblia bila malipo. Ofisa huyo akauliza, “Mtu anawezaje kujifunza Biblia?” Ndugu akamwonyesha broshua Furahia Maisha Milele! Na wakamfafanulia jinsi funzo la Biblia linavyoongozwa. Akina ndugu walifanya mipango ili wazungumze naye tena wakati ujao.

Baada ya dada kumwonyesha mwanamke mmoja tovuti yetu na kumweleza kifupi kuhusu kazi yetu ya kuhubiri, mwanamke huyo aliuliza hivi: “Ni utendaji gani mwingine ambao mnajihusisha nao?” Dada yetu alimwonyesha video yenye kichwa Ni Nini Hutendeka Katika Jumba la Ufalme? Mwanamke huyo alitazama video hiyo kwa makini. Kisha akasema: “Inaonekana kwenye mikutano yenu watu wana fadhili na ni wenye urafiki! Ningependa kuhudhuria.” Juma lililofuata, mwanamke huyo alisafiri kwa muda wa saa mbili hivi ili kuhudhuria mikutano.

Tunashukuru sana kwamba ndugu na dada zetu wa Bangkok walitumia fursa hiyo kuwasaidia wengine kujifunza kuhusu “amani ya Mungu inayozidi uelewaji wote.”​—Wafilipi 4:7.