Mashahidi wa Yehova walitoa Tafsiri ya Ulimwengu Mpya ya Maandiko ya Kigiriki ya Kikristo katika Kilaotiani katika kusanyiko la eneo lililofanyika huko Nong Khai, Thailand, Agosti 16, 2019. Ndugu Plakorn Pestanyee, mshiriki wa Halmashauri ya Tawi ya Thailand, alitoa Biblia hiyo katika siku ya kwanza ya kusanyiko hilo.

Timu iliyotafsiri ilikuwa na watu watatu na walichukua mwaka mmoja na nusu kuitafsiri. Mmoja wa watafsiri hao anasema: “Matokeo ni kwamba tumepata tafsiri inayoeleza ujumbe wa Biblia katika lugha ya kawaida ya Kilaotiani, na wakati huohuo inawasilisha kwa usahihi maana ya lugha iliyotumiwa, na hivyo kuwawezesha wanafunzi wa Biblia kuelewa maana ya ‘mambo ya Mungu yenye kina.’”—Ayubu 11:7.

Tafsiri hiyo ina vifaa muhimu vya kujifunzia kama vile fahirisi inayowawezesha wasomaji kupata mistari hususa ya Biblia na pia kamusi ya maneno ambayo inafafanua misemo iliyo katika Biblia. Mtafsiri mwingine anasema: “Tunapotumia tafsiri hii kufundisha, wanafunzi wa Biblia wataelewa mambo makuu kwa njia rahisi zaidi kuliko ilivyokuwa awali, na hivyo ujumbe utagusa mioyo yao, na jambo hilo litawasaidia wasitawishe urafiki wa karibu pamoja na Yehova.”

Tuna uhakika kwamba Tafsiri ya Ulimwengu Mpya ya Maandiko ya Kigiriki ya Kikristo itawasaidia ndugu na dada wanaozungumza Kilaotiani kuendelea kuwa na “uwezo kamili, [wakiwa] na vifaa kamili kwa ajili ya kila kazi njema.”—2 Timotheo 3:16, 17.