Januari ya mwaka wa 2023 ilihitimisha miaka 50 tangu majengo ya betheli yaliyo katika eneo la Normandy nchini Ufaransa, yalipoanza kutumiwa. Majengo hayo yaliwekwa wakfu miezi sita baadaye, Juni 9, 1973.

Kabla ya majengo ya Normandy kujengwa, kazi za Betheli ya Ufaransa zilifanywa katika jiji moja tu la Boulogne-Billancourt, karibu na Paris. Hata hivyo, baada ya muda, majengo yaliyo Boulogne-Billancourt yakawa hayatoshi kushughulikia mahitaji ya wahubiri ambao walikuwa wakiongezeka kwa kasi. Isitoshe, machapisho yalikuwa yakichapishwa Marekani na kisha kusafirishwa hadi Ufaransa na kuingia humo kupitia bandari iliyo katika jiji la Le Havre, upande wa magharibi wa Ufaransa. Jiji hilo lilikuwa umbali wa kilometa 200 hivi kutoka kwa ofisi ya tawi. Kwa hiyo, ili kupunguza muda uliohitajika kusafiri, umbali, na gharama zilizohusika, akina ndugu walianza kutafuta sehemu kati ya jiji la Boulogne-Billancourt na la Le Havre ili wajenge majengo zaidi ya Betheli.

Hatimaye, akina ndugu walipata uwanja mzuri katika mji mdogo wa Louviers, ulio Normandy. Eneo hilo liko kilometa 100 hivi kutoka jiji la Paris na jiji la Le Havre. Majengo hayo yalianza kujengwa mwaka wa 1972 na ujenzi ulikamilika baada ya miezi nane.

Idadi ya wahubiri wa Ufalme iliendelea kuongezeka katika miaka iliyofuata. Kwa sababu ya ukuzi huo, kulikuwa na uhitaji wa kujenga majengo zaidi kwenye uwanja wa Normandy. Uwanja mwingine uliokuwa hapo karibu ulinunuliwa na majengo mapya ya makazi yakajengwa, na katika mwaka wa 1996, Wanabetheli ambao walikuwa wamebaki katika jiji la Boulogne-Billancourt walihamishiwa Normandy.

Sasa, kuna zaidi ya wahubiri wa Ufalme 162,000 wanaohubiri habari njema katika nchi 13 zinazosimamiwa na ofisi ya tawi ya Ufaransa. Kazi ya uchapishaji iliacha kufanywa Normandy mwaka wa 1998, hata hivyo majengo hayo yalikarabatiwa ili yatumiwe kutegemeza sehemu nyingine za kazi ya kuhubiri na kufundisha kuhusu Ufalme. Hilo linatia ndani kazi ya kutafsiri machapisho yanayotegemea Biblia katika lugha 24. Video mbalimbali zinatokezwa pia kwenye ofisi hiyo ya tawi. Kufikia sasa, kuna ndugu na dada 400 wanaofanya kazi katika ofisi ya tawi.

Tunafurahi kuona jinsi Yehova ‘anavyoiharakisha’ kazi ya kuhubiri nchini Ufaransa!—Isaya 60:22.