Julai 25, 2019, sehemu mpya ya maonyesho ya Biblia ilifunguliwa katika ofisi ya tawi ya Mashahidi wa Yehova nchini Ufaransa katika mji wa Louviers, kilomita 100 hivi kutoka Paris. Kichwa cha maonyesho hayo ni “Jina la Mungu Katika Biblia ya Kifaransa”

Maonyesho hayo yana Biblia nyingi za kale na muhimu katika Kifaransa. Mojawapo ya nakala muhimu zaidi za awali ni Tafsiri ya Biblia ya Kifaransa ya Olivétan ya mwaka wa 1535, ambayo pia inajulikana kama “La Bible de Serrières.” Olivétan ndiyo tafsiri ya kwanza ya Biblia nzima ya Kiprotestanti katika Kifaransa. Vilevile, ni Biblia ya kwanza ya Kifaransa kutafsriwa kutoka katika lugha za awali. Baadaye, ilitumiwa kutafsiri Biblia nyingine kutia ndani tafsiri ya Kiingereza ya Matthew’s Bible ya mwaka 1537, Biblia ya Kifaransa ya Geneva Bible, na Biblia ya Kiingereza ya Geneva Bible. Biblia nyingine za kale zilizopo zinatia ndani toleo la tatu la Biblia ya Kifaransa ya Jacques Lefèvre d’Étaples ya mwaka wa 1541, Pentateuki ya Kilatini ya mwaka wa 1541, Biblia ya Kilatini ya 1545 iliyochapishwa na mchapishaji kutoka Paris, Robert Estienne, na Biblia ya Kifaransa iliyochapishwa na mchapishaji kutoka Lyon, Jean de Tournes ya mwaka 1557.

Jina la Mungu Yehova linapatikana katika Biblia ya Olivétan, Pentateuki ya Kilatini Biblia ya Kilatini ya Estienne, na Biblia ya Jean de Tournes. Mwanzoni Biblia hizo zilitolewa kama mchango kwenye Idara ya Makumbusho ya Makao Makuu ya Mashahidi wa Yehova huko Warwick, New York. Zimeongezwa kwenye mkusanyo wa Biblia zilizokuwa kwenye ofisi ya tawi ya Ufaransa.

Enrique Ford anayetumikia kwenye Idara ya Makumbusho anasema: “Maonyesho haya mapya ya Biblia katika ofisi yetu nchini Ufaransa yanaonyesha historia yenye kusisimua ya Biblia katika lugha ya Kifaransa. Vilevile yanakazia uhakika wa kuwepo kwa jina la Mungu, Yehova, katika Biblia. Tunaendelea kutafuta Biblia za kale zenye kusisimua ambazo tunaweza kuweka kwenye maonyesho yetu duniani kote.”