Oktoba 9, 2022, Ndugu Paul Norton, mshiriki wa Halmashauri ya Tawi ya Uingereza alitoa Biblia—Habari Njema Kulingana na Mathayo katika Kipunjabi (cha Shamuki) kwenye programu iliyohudhuriwa na watu zaidi ya 1,300. Hudhurio hilo linatia ndani wahubiri waliounganishwa kwenye programu hiyo katika Majumba ya Ufalme kotekote katika eneo la ofisi ya tawi ya Uingereza. Baada ya Biblia hiyo kutolewa, watu wote wangeweza kuipata katika mfumo wa sauti au kwa njia ya kielektroni. Nakala zilizochapishwa zilipatikana pia.

Kipunjabi kinazungumzwa na mamilioni ya watu katika India na Pakistan na pia kwenye nchi nyingine. Biblia Takatifu—Tafsiri ya Ulimwengu Mpya katika Kipunjabi kinachotumia alfabeti ya Gurmuki ilitolewa Oktoba 2020. Hata hivyo, toleo hili jipya litatumiwa na watu wanaosoma Kipunjabi cha alfabeti ya Shamuki, ambao kwa kawaida hawasomi alfabeti ya Gurmuki au ambao hawaelewi maneno ya alfabeti hiyo. Kufikia sasa, wasomaji wa lugha ya Kipunjabi (cha Shamuki) walilazimika kutumia tafsiri za lugha nyingine kama vile Kiurdu.

Kwa muda mrefu, vitabu vya Biblia vimetafsiriwa katika Kipunjabi (cha Shamuki). Hata hivyo, tafsiri hii mpya ya kitabu cha Mathayo inatumia maneno rahisi na inaeleweka vizuri. Jambo muhimu hata zaidi ni kwamba tafsiri hii inatumia jina Yehova.

Mmoja wa watafsiri wa Biblia hiyo mpya alisema hivi: “Huenda watu wamesikia jina Yehova likitumiwa kwenye nyimbo kanisani. Hata hivyo, katika Biblia nyingi watafsiri wameliondoa jina hilo kwenye mistari mingi ya Biblia, na hilo hufanya watu wengi kuhisi kwamba hawawezi kumkaribia Mungu. Sasa katika kitabu hiki cha Biblia wataona jina la Mungu kila mahali linapopaswa kuwa.”

Tuna hakika kwamba toleo hili litawasaidia ndugu na dada zetu kuendelea kumkaribia Yehova na kusifu jina lake.​—Mathayo 6:9.