Aprili 22, 2023, Makumbusho ya Kambi ya Mateso ya Flossenbürg yaliyo Bavaria, nchini Ujerumani, yalitengeneza bamba la kuwakumbuka Mashahidi wa Yehova waliokufa walipokuwa kifungoni humo. Kambi hiyo ndio kambi ya makumbusho ya tisa ambayo imewatambua Mashahidi wa Yehova kwa kutengeneza bamba la kumbukumbu.

Mashahidi wa Yehova zaidi ya 100 walifungwa katika kambi ya Flossenbürg na kambi zilizo karibu. Baadhi ya washiriki wa familia za Mashahidi hao walihudhuria sherehe hiyo. Ndugu mmoja aliyehudhuria alisema kwamba “kuwa mahali hapo pa makumbusho ambapo mambo maovu yalifanywa, kulihuzunisha sana. Hata hivyo, kufikiria uaminifu wa ndugu zetu kulifanya pindi hiyo iwe yenye shangwe na yenye adhama.”

Profesa Jörg Skriebeleit, mkurugenzi wa Makumbusho ya Kambi ya Mateso ya Flossenbürg, alieleza kwamba “Mashahidi wa Yehova walikuwa dini ya kwanza kupigwa marufuku baada ya [Wanazi] kuchukua uongozi Machi 1933.” Katika hotuba fupi, alisema kwamba “imani iliwaimarisha [Mashahidi] na kuwapa nguvu katika kambi ya mateso . . . si ya kuokoka wenyewe tu, bali pia [nguvu] ya kuwasaidia wengine ambao hawakuwa wa dini yao.”

Ndugu Wolfram Slupina, ambaye ni msemaji wa Mashahidi wa Yehova nchini Ujerumani, alihutubia wahudhuriaji. Aliwaambia hivi: “Ni jambo muhimu kwetu sote kwamba historia ya Mashahidi wa Yehova wakiwa kikundi kilichoteswa katika kambi hizi haijasahaulika, yaani, historia ya watu ambao walikuwa tayari kufuata dhamiri zao katika kipindi kibaya zaidi kwenye historia ya Ujerumani.”

Tuna uhakika kwamba ndugu na dada zetu ambao waliteswa na hata kufa katika kambi hizi za mateso wako katika “kitabu cha kumbukumbu” cha Mungu.​—Malaki 3:16.