Septemba 15, 2024, Makumbusho ya Sachsenhausen yaliyo Oranienburg, Ujerumani, yalifungua maonyesho ya muda mfupi yanayoitwa “Mashahidi wa Yehova Wasimama Imara Dhidi ya Mateso ya Wanazi.” Maonyesho hayo yatakuwepo hadi katikati ya mwezi wa Desemba 2024. Maonyesho hayo yalifunguliwa siku ileile ambayo Ndugu August Dickmann aliuawa. Ndugu huyo aliuawa miaka 85 iliyopita. August alikuwa mtu wa kwanza aliyejulikana kwa jina ambaye aliuawa na Wanazi kwa sababu za kidini. Alikataa kujiunga na jeshi kwa sababu ya dhamiri.

Serikali ya Wanazi iliwaua zaidi ya Mashahidi 280 wa Yehova kwa kukataa kujiunga na jeshi. Maonyesho hayo yalikuwa na sehemu 33 zilizokuwa na maandishi na picha zilizoonyesha mambo ambayo baadhi ya Mashahidi hao walipitia. Dada Emmy Zehden ni mmoja kati ya waliozungumziwa.Juni 9, 1944, aliuawa katika gereza la Plötzensee huko Berlin, Ujerumani kwa sababu alimficha mtoto wake wa kambo, Horst, pamoja na Gerhard Liebold na Werner Gaßner. Ndugu hao watatu walikuwa wamekataa kujiunga na jeshi.

Maonyesho hayo yalipokuwa yakizinduliwa, Ndugu Hans-Joachim Rehwald alihojiwa, na katika mahojiano hayo alizungumza kuhusu baba yake, Josef. Mwaka wa 1938, Josef alikataa kujiunga na jeshi la Ujerumani. Kwa sababu hiyo alikamatwa na kuhukumiwa kifungo cha mwaka mmoja gerezani. Baadaye alifungwa katika kambi tatu za mateso kutia ndani kambi ya Sachsenhausen. Alishuhudia August Dickmann akiuawa. Licha ya majaribu hayo, Josef aliendelea kuwa mshikamanifu kwa Yehova. Baada ya kutembelea maonyesho hayo, ndugu mmoja alisema hivi: “Niliguswa moyo nilipoona jinsi ndugu na dada zangu walivyoepuka kuunga mkono upande wowote wa kisiasa hata ingawa kufanya hivyo kungehatarisha maisha yao. Ningependa kuwa mshikamanifu kwa Yehova kama walivyokuwa.”

Tunawathamini ndugu na dada zetu ambao kwa ujasiri walisimama imara dhidi ya utawala wa Wanazi. Leo, Mashahidi wengi wanateswa kwa sababu hawaungi mkono upande wowote wa kisiasa. Hata hivyo, ndugu na dada zetu walioendelea kuwa washikamanifu wakati wa utawala wa Wanazi wametuwekea mfano mzuri wa imani na hilo linatuhakikishia kwamba Yehova atatutegemeza na kutuimarisha tunapokabili majaribu.​—1 Petro 5:10.