Julai 6, 2023, kikundi cha vijana 15 Mashahidi wa Yehova katika jiji la Kassel, Ujerumani, walishinda nafasi ya kwanza baada ya kuwasilisha mradi wao uliohusu mfano wa ujasiri wa Dada Wilhelmine Pötter, aliyekufa kutokana na mateso ya Wanazi.

Shirika la Stolpersteine huko Kassel, limeweka nguzo ndogondogo kotekote katika jiji la Kassel zilizo kama mawe ya kukanyagia, lengo likiwa kuwakumbuka wote waliouawa wakati wa utawala wa Wanazi. Miongoni mwa wale waliokumbukwa ni Wilhelmine na mume wake, Justus Pötter. Katika kijiji jirani cha Niestetal, kuna barabara moja inayoitwa kwa jina la Wilhelmine. Ili kuadhimisha miaka kumi ya shirika la hilo la Stolpersteine, wanafunzi katika jiji lote walialikwa wachague mtu mmoja kati ya walioathiriwa na mateso ya Wanazi, waripoti kuhusu maisha yake, kisha wazungumzie walijifunza masomo gani.

Kikundi cha akina ndugu na dada, walio na umri wa kati ya miaka 13 hadi 23, walichagua kuzungumzia maisha ya Wilhelmine. Walitayarisha video ya dakika 24 kuhusu maisha yake iliyokuwa na kichwa Alimtii Mungu Peke Yake. Video hiyo ilisimulia jinsi Wilhelmine alivyofungwa na Wanazi mwaka wa 1937 na kufa mwaka wa 1942 akiwa na umri wa miaka 49, katika kambi ya mateso ya Ravensbrück. Mbali na hilo, wanafunzi walitayarisha mabango madogo yaliyokuwa na picha za barua ambazo Wilhelmine alimwandikia mume wake na familia yake alipokuwa gerezani. Mabango hayo yaliwekwa kwenye kituo cha basi kilicho kwenye barabara inayoitwa Wilhelmine.

Aprili 25, 1937, Wilhelmine alimwandikia mume wake barua iliyosema hivi: “Mpendwa Justus, nilifurahi kusikia kwamba sote wawili tuliendelea kuwa watulivu na imara katika imani tulipokuwa tukihukumiwa. Sasa tunaacha kila kitu mikononi mwa Bwana, ili yeye aendelee kutuongoza. Zaidi ya yote, ninamwomba Bwana atuimarishe kiroho na kimwili, ili tuweze kutimiza ahadi tuliyomtolea kwamba tutaendelea kuwa waaminifu hadi mwisho. Hawezi kuruhusu tubebe mzigo mzito kuliko tunavyoweza kuhimili. Kwa hiyo, tutamtegemea Bwana wetu tukiwa na tumaini imara.” Sala yake ilijibiwa kwa sababu wote wawili waliendelea kuwa waaminifu hadi walipokufa.

Dada Alexandra Altemeier, mwenye umri wa miaka 23, alisema maneno yafuatayo kwenye video hiyo: “Wilhelmine na mume wake walijua kwamba kuwa mfuasi wa Kristo kungemaanisha kukabili mateso. Walikubali kukamatwa, kuteswa, na hata kuuawa kwa sababu ya imani yao kwa sababu walijua Mungu asingewasahau.” Ndugu Ole Schröder, mwenye umri wa miaka 18, alisaidia pia katika mradi huo. Alisema hivi: “Mfano wa Dada Pötter unanichochea sana. Anastahili kuigwa kwa sababu ya imani yake, ushikamanifu wake kwa Mungu, uvumilivu, na kwa sababu hakupoteza shangwe yake. Mfano wake umenionyesha kwamba kuwa rafiki ya Mungu ni jambo lenye thamani sana.”

Wakati wa sherehe hiyo ya kutoa tuzo, video yote ilionyeshwa mbele ya watu 180 waliohudhuria. Waliohudhuria walitia ndani wanafunzi wengine, wanahabari, meya wa jiji, msimamizi wa Wizara ya Utamaduni, na msimamizi wa wilaya.

Kama tu ndugu na dada walioshiriki mradi huo, sisi pia tunatiwa moyo na kuchochewa na mifano ya imani na ujasiri ambayo Justus na Wilhelmine walionyesha. Tuna uhakika kwamba Yehova hatawasahau waaminifu wake.​—Waebrania 6:10.