Julai 1948, katika jiji la Kassel nchini Ujerumani, Mashahidi wa Yehova walikuwa na kusanyiko kubwa zaidi kufanywa barani Ulaya muda mfupi baada ya Vita vya Pili vya Ulimwengu. Mashahidi wa Yehova walikuwa na maonyesho huko Kassel miaka 70 baada ya kusanyiko hilo. Katika siku 12 za maonyesho hayo, watu zaidi ya 2,000 walihudhuria. Tukio hilo pia lilionyeshwa na stesheni moja ya televisheni nchini Ujerumani na magazeti kadhaa ya habari.

Kusanyiko hilo la kihistoria la Kassel lilikuwa na kilele cha watu 23,150, kutia ndani watu 1,200 waliobatizwa. Wasemaji na wahudhuriaji wengi walikuwa ndugu waliookoka kambi za mateso. Kwa sababu hiyo, sherehe ya kufungua maonyesho hayo ilitia ndani hotuba ya msimamizi wa Eneo la Makumbusho la Kambi ya Mateso ya Breitenau, Dakt. Gunnar Richter, ambaye alieleza jinsi Mashahidi wa Yehova walivyoteseka wakati wa utawala wa Wanazi.

Maonyesho hayo yalikuwa na picha zilizoonyesha jinsi eneo la Kassel lilivyokuwa karibu kuharibiwa na mapigano ya Vita vya Pili vya Ulimwengu. Ndugu walipopanga kusanyiko hilo, wenye mamlaka wangeweza tu kuwapa eneo lililokuwa na mashimo makubwa kwa sababu ya mabomu yaliyolipiga. Ndugu Kurt Rex, aliyekuwepo kwenye kusanyiko hilo, alisema hivi kuhusu kazi kubwa iliyofanywa kwa majuma manne hivi ili kutayarisha eneo hilo: “Kazi yenyewe ilikuwa ngumu sana. Kwanza tulitumia ndoo kuchota maji yaliyokuwa ndani ya mashimo yaliyosababishwa na mabomu. Baada ya kufanya hivyo ndipo ilipoanza kazi kubwa ya kujaza mawe na vifusi kutoka nyumba zilizoharibiwa kwenye ujirani huo. Kutandaza ardhi pia ilikuwa kazi ngumu, kwa sababu hatukuwa na mashine kubwa zinazotumiwa kutandaza. Kwa kuwa mvua ilikuwa ikinyesha muda wote huo, tulilowa sikuzote.” Licha ya mvua iliyonyesha muda wote huo, ndugu zetu walihamisha mawe na vifusi vyenye ukubwa wa mita 10,000 mchemraba.

Katika hotuba yake ya utangulizi wa maonyesho hayo, Wolfram Slupina, mwakilishi wa ofisi ya tawi ya Mashahidi wa Yehova nchini Ujerumani, alifafanua hivi roho iliyowachochea ndugu na dada walipojitayarisha kwa ajili ya kusanyiko hilo: “Baada ya kuwekwa huru kutoka kambi za mateso, hawakujihurumia au kutaka kulipiza kisasi. . . . Uhuru waliopata uliwachochea kihalisi.”

Mwakilishi wa baraza la jiji la Kassel, Ester Kalveram, alisema hivi katika hotuba yake: “Kusanyiko hilo halikuwa la pekee kwa Mashahidi wa Yehova tu bali pia kwa jiji la Kassel.”

Kusanyiko la Kassel la mwaka wa 1948 na maonyesho ya miaka 70 baadaye, yaani, mwaka huu wa 2018 yanathibitisha kwamba watu wa Yehova wameazimia kukusanyika pamoja ili wapate elimu ya Biblia licha ya changamoto mbalimbali.—Zaburi 35:18.