Katika sehemu mbalimbali nchini Ukrainia, mashambulizi ya makombora yameharibu barabara, madaraja, na vituo vya kuzalisha umeme. Licha ya kwamba umeme unakatika mara nyingi, ndugu zetu wanaendelea kuhudhuria mikutano ya kutaniko na kushiriki katika utendaji mwingine wa kitheokrasi.

Anastasia na Debora, mapainia wanaotumikia jijini Kyiv, wanasema kwamba umeme unakatika kwa angalau saa 12 kila siku. Wanachaji simu zao umeme unaporudi na pia wanazitumia kupata Intaneti ili wahudhurie mikutano. Mara nyingi Intaneti hupotea baada tu ya mkutano kumalizika.

Tatizo lingine linalotokana na ukosefu wa umeme ni kwamba mifumo au vifaa vya kupasha nyumba joto haviwezi kufanya kazi. Akina ndugu fulani wanatumia jenereta kutokeza umeme na hivyo kupasha nyumba joto. Wengine wanahamia kwenye nyumba za watu wao wa ukoo ambao mifumo yao ya kupasha joto inafanya kazi. Nao wengine wanavumilia tu baridi. Inapendeza kwamba ndugu wengi wana nyumba ambazo zinatumia gesi kupasha joto, hivyo joto linaendelea kuwepo hata umeme unapokatika.

Iryna, ambaye ni painia katika mji wa Ivano-Frankivsk, ameamua kudumisha mtazamo mzuri. Alisema hivi: “Nimeamua kwamba sitakazia fikira mambo ambayo siwezi kutatua. Kwa hiyo, mimi huwaza tu kuhusu mambo ambayo yatafanyika ndani ya saa moja. Ninafikiria pia kile nitakachofanya umeme unapokatika na ninahakikisha kwamba nimepakua mapema machapisho ninayohitaji.

Licha ya kwamba ndugu na dada zetu nchini Ukrainia wanapitia changamoto nyingi, wana bidii katika utumishi wa Yehova. Tuna uhakika kwamba Yehova ataendelea kubariki jitihada zao za “kufanya mema.”​—Wagalatia 6:9.

Kufikia Desemba 6, 2022, hizi ndizo takwimu zilizotufikia kutoka Ukrainia. Takwimu hizo zinategemea ripoti za uhakika tulizopata kutoka kwa ndugu walio katika maeneo hayo. Hata hivyo, huenda idadi halisi ikawa kubwa zaidi kwa sababu ni vigumu kudumisha mawasiliano mazuri katika maeneo yote nchini.

• Wahubiri 47 wamekufa

• Wahubiri 97 wamejeruhiwa

• Wahubiri 11,537 wamelazimika kuacha makao yao

• Nyumba 590 zimeharibiwa kabisa

• Nyumba 645 zimepata uharibifu mkubwa

• Nyumba 1,722 zimepata uharibifu mdogo

• Majumba 7 ya Ufalme yameharibiwa kabisa

• Majumba 19 ya Ufalme yamepata uharibifu mkubwa

• Majumba 68 ya Ufalme yamepata uharibifu mdogo

• Halmashauri 27 za Kutoa Msaada zinashughulikia hali nchini Ukrainia

• Watu 54,212 wamesaidiwa moja kwa moja na halmashauri hizo kupata makao salama zaidi

• Wahubiri 26,811 wamekimbilia nchi nyingine na wanasaidiwa na waamini wenzetu