Nyumba 3,000 hivi za Mashahidi wa Yehova zimepata uharibifu mkubwa au zimeharibiwa kabisa tangu vita vilipoanza nchini Ukrainia, Februari 2022. Katika mwezi wa Agosti, akina ndugu nchini Ukrainia walianza kazi ya kurekebisha nyumba zilizopata uharibifu katika maeneo ambayo ni salama, chini ya usimamizi wa Idara ya Kutoa Msaada pamoja na Idara ya Usanifu-Majengo. Wanarekebisha paa za nyumba, madirisha, pamoja na marekebisho mengine madogo-madogo. Katika visa fulani, ikiwa nyumba iliharibiwa kabisa basi chumba cha kuegesha gari au hata kibanda kinachotumiwa kuhifadhi vitu, vinabadilishwa na kuwa mahali pa kuishi. Kufikia sasa, miradi 37 ya ujenzi imekamilika na kuna miradi mingine 48 inayoendelea.

Ni changamoto kubwa kufanya kazi ya ujenzi katika kipindi hiki chenye machafuko. Lakini ndugu hao hawakusita kujitoa katika kazi hii ya kutoa msaada. Dada Svitlana mwenye umri wa miaka 70 anayeishi Velyka Dymerka katika Eneo la Kyiv anasema hivi: “Sikuwa na pesa za kurekebisha paa na eneo la mbele la nyumba yangu. Yehova alinifanyia jambo la pekee sana. Ndugu zangu walikuja na kufanya marekebisho hayo ndani ya siku tatu tu.”

Dada Nadiia anayeishi Horenka, katika Eneo la Kyiv, anasema kwamba kazi hiyo ya kutoa msaada imeleta matokeo mazuri katika huduma. Anasema hivi: “Kazi ya kufanya marekebisho imetoa ushahidi mkubwa kwa watu wote. Hata watu ambao siwajui wanasema kwamba Mashahidi wa Yehova wana upendo wa kipekee miongoni mwao. Wanashangaa sana kuona kwamba waamini wenzangu walikuja kunisaidia.”

Ingawa wengine wamepoteza nyumba zao, wao pia wanashiriki katika kazi hiyo ya ujenzi. Nyumba ya Yevhen na Tetiana ambao ni wenzi wa ndoa, iliangukiwa na kombora na kuharibiwa kabisa. Badala ya kukazia fikira vitu walivyopoteza wanafanya kazi kwa bidii ili kuwasaidia waabudu wenzao. Yevhen anasema: “Sikuzote kusudi letu kuu limekuwa kuwasaidia wengine. Kuwahudumia wengine hutusaidia kukabiliana na matatizo yetu wenyewe.”

Vivyo hivyo, baada ya akina ndugu kurekebisha nyumba ya Dada Lidiia huko Hostomel katika Eneo la Kyiv, alitamani kujitolea pia na kushiriki katika jitihada za kutoa msaada. Alisema: “Kwa majuma mawili, ndugu na dada 16 walifanya kazi ya kurekebisha nyumba yangu. Nilihisi kana kwamba tayari ninaishi katika ulimwengu mpya. Sasa mimi pia ninataka kuwasaidia wengine.”

Hivi karibuni, mshiriki mmoja wa Halmashauri ya Tawi ya Ukrainia alitembelea maeneo ambayo kazi hiyo ya kutoa msaada ilikuwa ikiendelea ili kuwatia moyo wale waliopoteza makao yao. Alisema: “Sikuzote, ndugu na dada nchini Ukrainia wamekuwa wakionyeshana upendo mwingi. Hata hivyo, vita hivi vimetuleta karibu hata zaidi. Inatia moyo kuona jinsi msaada ambao ndugu zetu wanapata unavyowasaidia kujitoa zaidi katika huduma na kuwa na “utajiri wa shukrani nyingi kwa Mungu,” kama 2 Wakorintho 9:12 inavyosema.”

Kufikia Desemba 20, 2022, hizi ndizo takwimu zilizotufikia kutoka Ukrainia. Takwimu hizo zinategemea ripoti za uhakika tulizopata kutoka kwa ndugu walio katika maeneo hayo. Hata hivyo, huenda idadi halisi ikawa kubwa zaidi kwa sababu ni vigumu kudumisha mawasiliano mazuri katika maeneo yote nchini.

• Wahubiri 47 wamekufa

• Wahubiri 97 wamejeruhiwa

• Wahubiri 11,477 wamelazimika kuacha makao yao

• Nyumba 590 zimeharibiwa kabisa

• Nyumba 645 zimepata uharibifu mkubwa

• Nyumba 1,722 zimepata uharibifu mdogo

• Majumba 7 ya Ufalme yameharibiwa kabisa

• Majumba 19 ya Ufalme yamepata uharibifu mkubwa

• Majumba 68 ya Ufalme yamepata uharibifu mdogo

• Halmashauri 26 za kutoa msaada zinashughulikia hali nchini Ukrainia

• Watu 54,212 wamesaidiwa moja kwa moja na halmashauri hizo kupata makao salama zaidi

• Wahubiri 26,892 wamekimbilia nchi nyingine na wanasaidiwa na waamini wenzetu