Katika maeneo ambapo vita ni vikali, kama vile Mariupol, hakuna umeme au mifumo ya kupasha nyumba joto, na huduma za simu na Intaneti zimekatizwa. Madirisha ya nyumba nyingi yamevunjika. Kuna chakula na maji kidogo sana. Zaidi ya ndugu na dada 2,500 wameshindwa kuondoka jiji la Mariupol. Katika majiji machache, kama vile Bucha, Chernihiv, Hostomel, Irpin, Kyiv, na Sumy, ruhusa fulani ilipatikana na hivyo baadhi ya watu walifaulu kuondoka. Hilo liliwezesha ndugu na dada wengi kukimbilia maeneo salama zaidi.

Mzee na painia mwenye umri wa miaka 36 aliyekuwa akiishi katika jiji la Hostomel, alikimbia pamoja na mke wake na wazazi wake. Anasimulia mambo aliyokabili jiji lao liliposhambuliwa:

“Helikopta zilipita juu ya nyumba yetu. Magari ya jeshi yalikuwa kila mahali barabarani muda wote. Wanajeshi walivamia nyumba yetu tulipokuwa tumejificha kwenye chumba cha chini ya ardhi. Mmoja wao alifyatua risasi kadhaa kwenye chumba hicho. Risasi hizo zilipiga mkoba wa dharura wa mama yangu lakini hazikutudhuru. Kwa karibu saa tatu au nne, hatukusogea au kutoa sauti yoyote kwa kuwa makombora yalikuwa yakilipuka na risasi zilikuwa zikirushwa. . . . Asubuhi iliyofuata tulipokuwa tukiondoka, vita vilianza tena karibu na mahali tulipokuwa. Vifaru vilikuwepo barabarani . . . Ilikuwa hatari sana kusafiri, lakini ingekuwa hatari zaidi kubaki hapo.

“Matukio yote hayo yamebadili sana maisha yetu. Tumejifunza jinsi ya kutumia kanuni nyingi za Biblia. Kwa mfano, kuepuka kuhangaikia mambo ya kesho, kuridhika na mahitaji ya msingi, na kumtegemea Yehova tunapokabili hali ngumu sana.”

Tunajua kwamba Mungu wetu, Yehova, anatambua kabisa hali ngumu sana ambazo ndugu na dada zetu nchini Ukrainia wanakabili. Hatashindwa kuwategemeza.​—2 Petro 2:9.

Kufikia Machi 10, 2022, hizi ndizo takwimu zilizotufikia kutoka Ukrainia:

• Wahubiri 2 wamekufa

• Wahubiri 8 wamejeruhiwa

• Wahubiri 25,407 wameacha makao yako na kwenda sehemu zilizo salama zaidi nchini

• Nyumba 25 ziliharibiwa kabisa

• Nyumba 59 zilipata uharibifu mkubwa

• Nyumba 222 zilipata uharibifu mdogo

• Majumba 7 ya Ufalme yameharibiwa

• Halmashauri 27 za Kutoa Msaada zinashughulikia hali nchini Ukrainia

• Wahubiri 10,566 walisaidiwa moja kwa moja na halmashauri hizo kupata makao salama zaidi

• Wahubiri 9,635 wamekimbilia nchi nyingine na wanasaidiwa na waamini wenzetu