Tunaendelea kusali kwa ajili ya ndugu na dada zetu walio Mariupol, ambapo vita vinaendelea barabarani na makombora yanaendelea kuangushwa. Inasikitisha kwamba ndugu na dada sita walikufa kutokana na milipuko ya makombora. Jumla ya ndugu na dada kumi wamekufa nchini Ukrainia. Pia, kama ilivyoripotiwa kwenye habari juma lililopita, kombora lilirushwa kwenye ukumbi wa sinema ambapo zaidi ya watu 1,000 walikuwa wakijificha. Hakuna yeyote kati ya ndugu zetu aliyekufa wakati wa shambulizi hilo lakini baadhi yao walipata majeraha madogo.

Ndugu 750 hivi wamekimbia kutoka Mariupol, lakini inakadiriwa kwamba ndugu 1,600 bado wamo jijini humo. Wengi wao wako katika upande wa mashariki wa jiji hilo, na eneo hilo liko chini ya udhibiti wa jeshi la Urusi.

Kama ilivyoripotiwa hapo awali, ndugu na dada 200 hivi wamekuwa wakijificha katika chumba cha chini ya ardhi kilicho kwenye Jumba la Ufalme na Jumba la Kusanyiko. Akina ndugu walio katika chumba hicho walitupatia ripoti ifuatayo walipofaulu kuwasiliana nasi kwa muda mfupi:

“Makombora yalipokuwa yakirushwa, baadhi ya akina ndugu na dada waliogopa sana. Wengine hata walianza kulia. Tuliposikia makombora yakilipuliwa huko nje, tulifikiri kwamba huenda tutakufa kutokana na milipuko hiyo au kutokana na moto. Mzee mmoja alipendekeza kwamba tuimbe nyimbo za Ufalme. Tuliimba nyimbo 10 hadi 15 mfululizo. Kadiri sauti ya milipuko hiyo ilivyozidi kuongezeka na jengo kuanza kutetemeka, ndivyo tulivyoimba kwa sauti kubwa zaidi. Kisha tukasoma Zaburi 27 na kuizungumzia. Baada ya hapo, wote walianza kutaja maandiko ya Biblia waliyopenda zaidi na kueleza jinsi mistari hiyo ilivyowaimarisha. . . . Tulijionea wazi kwamba Yehova ni ‘Baba wa rehema nyororo na Mungu wa faraja yote,’ ambaye anaweza kututuliza hata tunapokabili hali ngumu sana.”​—2 Wakorintho 1:3, 4.

Wazee wanaojidhabihu na washiriki wa Halmashauri ya Kutoa Msaada wanawaletea waabudu wenzao chakula na dawa inapohitajika, hata ikiwa wanalazimika kuhatarisha uhai wao wenyewe. Nyakati fulani, ndugu hao wanalazimika kutambaa ili wajilinde risasi zinapofyatuliwa wanapowatafuta ndugu zao jijini. Tunajivunia ndugu hao ambao ‘wanahatarisha shingo zao’ kwa ajili ya waabudu wenzao.​—Waroma 16:4.

Kwa kuwa hakuna gesi wala umeme, akina dada jasiri kotekote jijini wanawasha moto nje ili kupika chakula. Kisha wahubiri wenye umri mkubwa na walemavu wanapelekewa chakula hicho. Ndugu wengi wamepoteza nyumba, magari, na mali zao, lakini wanashukuru kwa upendo na utunzaji ambao wamepata kutoka kwa waabudu wenzao.

Wale waliojificha katika makao ya muda, wanajaribu kuendelea na ratiba yao ya kiroho ya kujifunza Biblia pamoja na kuwahubiria wengine ujumbe wa Biblia inapowezekana.

Kufikia Machi 22, 2022, hizi ndizo takwimu zilizotufikia kutoka Ukrainia. Takwimu hizo zinategemea ripoti za uhakika tulizopata kutoka kwa ndugu walio katika maeneo hayo. Hata hivyo, huenda idadi halisi ikawa kubwa zaidi kwa sababu ni vigumu kudumisha mawasiliano mazuri katika maeneo yote nchini.

• Wahubiri 10 wamekufa

• Wahubiri 27 wamejeruhiwa

• Wahubiri 33,180 wameacha makao yao na kwenda sehemu zilizo salama zaidi nchini.

• Nyumba 78 zimeharibiwa kabisa

• Nyumba 102 zimepata uharibifu mkubwa

• Nyumba 484 zimepata uharibifu mdogo

• Jumba 1 la Ufalme limeharibiwa kabisa

• Majumba 4 ya Ufalme yamepata uharibifu mkubwa

• Majumba 18 ya Ufalme yamepata uharibifu mdogo

• Halmashauri 27 za kutoa msaada zinashughulikia hali nchini Ukrainia

• Wahubiri 25,069 wamesaidiwa moja kwa moja na halmashauri hizo kupata makao salama zaidi

• Wahubiri 14,308 wamekimbilia nchi nyingine na wanasaidiwa na waamini wenzetu