Ofisi ya tawi ya Ukrainia inaendelea kushughulikia mahitaji ya ndugu na dada zetu waliopoteza makao yao kupitia Halmashauri 27 za Kutoa Msaada. Tangu vita vilipoanza, zaidi ya tani 250 za msaada zimesafirishwa kutoka Poland na msaada huo unatia ndani vyakula, nguo, na vitu vingine muhimu kwa ajili ya kudumisha usafi. Vilevile, ndugu zetu wanaoishi katika maeneo ambayo hayajaathiriwa na vita nchini humo wametoa msaada wa tani 80 za vyakula.

Valentyna dada kutoka Kyiv, alisema hivi kuhusu msaada aliopokea kutoka kwa akina ndugu wanaofanya kazi katika Halmashauri ya Kutoa Msaada: “Hali zilipoanza kuwa mbaya, niliona ni hatari kuendelea kuishi katika jiji hilo. Hivyo, nilikimbilia mji mdogo ulio katika eneo la Cherkasy, na sasa nimekuwa nikiishi huku kwa zaidi ya miezi miwili. Ndugu na dada katika kutaniko ninalohudhuria wamenionyesha ufikirio kwa njia kubwa. Waliniletea maboksi kadhaa ya vyakula na bidhaa za usafi. Baada ya kuona jinsi wanavyonihangaikia nililemewa na hisia. Katika boksi moja, kulikuwa na mchoro uliochorwa na mtoto mwenye umri wa miaka minne anayeitwa Blanca, aliambatanisha mchoro huo na barua maridadi aliyopaka rangi ya maji . . . nitahifadhi michoro hiyo, ili nisisahau kamwe zawadi hii niliyopewa kwa fadhili. Ninawashukuru ndugu zangu wote kutoka moyoni, na muhimu zaidi, ninamshukuru Yehova.”

Dada mwingine ambaye pia anaitwa Valentyna, anaishi Sieverodonetsk. Ana umri wa miaka 83, na ni mlemavu. Aliandika maneno haya: “Nilikuwa ninaishi peke yangu vita vilipoanza. Kabla ya vita hivyo kuanza nilimpoteza mwana wangu wa pekee. Nilikuwa na wasiwasi mwingi sana kwa sababu makombora yalikuwa yakilipuka kuanzia asubuhi mpaka jioni. Pia, hakukuwa na maji, umeme, gesi, na hata huduma za Intaneti hazikuwa nzuri. Ninathamini sana jitihada za ndugu walionisaidia licha ya kwamba walijua wanahatarisha uhai wao.”

Pia aliandika maneno haya: “Baadaye, ndugu hao walinipeleka mimi pamoja na dada wengine wawili hadi kwenye jiji la Dnipro ambalo lilikuwa salama zaidi. Tulipofika jijini Dnipro, akina ndugu walinisaidia kupata mahali pa kuishi. Sasa ninaishi pamoja na familia ya waamini wenzetu, nao wananijali kikweli. Wananitendea kama mtu wa familia yao. Hata wamenipatia simu-janja ili niweze kuhudhuria na pia kushiriki katika mikutano. Sitawahi kusahau fadhili nilizoonyeshwa na ndugu zangu.”

Mioyo yetu imejaa shangwe, na tunamshukuru Baba yetu mwenye upendo, Yehova, anayeendelea kuwatunza ndugu na dada zetu wapendwa nchini Ukrainia hivi kwamba ‘hawakosi chochote chema.’​—Zaburi 34:10.

Kufikia Juni 7, 2022, hizi ndizo takwimu zilizotufikia kutoka Ukrainia. Takwimu hizo zinategemea ripoti za uhakika tulizopata kutoka kwa ndugu walio katika maeneo hayo. Hata hivyo, huenda idadi halisi ikawa kubwa zaidi kwa sababu ni vigumu kudumisha mawasiliano mazuri katika maeneo yote nchini.

• Wahubiri 42 wamekufa

• Wahubiri 82 wamejeruhiwa

• Wahubiri 46,145 wameacha makao yao na kwenda sehemu zilizo salama zaidi nchini

• Nyumba 469 zimeharibiwa kabisa

• Nyumba 540 zimepata uharibifu mkubwa

• Nyumba 1,405 zimepata uharibifu mdogo

• Majumba 5 ya Ufalme yameharibiwa kabisa

• Majumba 8 ya Ufalme yamepata uharibifu mkubwa

• Majumba 33 ya Ufalme yamepata uharibifu mdogo

• Halmashauri 27 za kutoa msaada zinashughulikia hali nchini Ukrainia

• Watu 50,663 wamesaidiwa moja kwa moja na halmashauri hizo kupata makao salama zaidi

• Wahubiri 22,995 wamekimbilia nchi nyingine na wanasaidiwa na waamini wenzetu