Julai 5, 2024, Ndugu Colin Carson, mshiriki wa Halmashauri ya Tawi ya Malawi, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Lugha ya Ishara ya Malawi. Tangazo hilo lilitolewa mbele ya watu 331 waliohudhuria siku ya kwanza ya Kusanyiko la Eneo la ‘Tangaza Habari Njema!’ la 2024 huko Lilongwe, Malawi. Biblia hiyo ingeweza kupakuliwa mara moja kwenye jw.org na programu ya JW Library Sign Language.

Hiyo ndiyo tafsiri ya kwanza kamili ya Maandiko ya Kigiriki ya Kikristo kutolewa katika Lugha ya Ishara ya Malawi, inayotumiwa na zaidi ya watu 400,000. Kwa sasa, zaidi ya ndugu na dada 600 wanatumikia katika makutaniko 16 ya lugha ya ishara na vikundi 8 nchini Malawi.

Julai 19, 2024, Ndugu Gage Fleegle, mshiriki wa Baraza Linaloongoza, alitangaza kutolewa kwa Biblia Takatifu—Tafsiri ya Ulimwengu Mpya iliyorekebishwa katika Kichibemba. Tangazo hilo lilitolewa siku ya kwanza ya Kusanyiko la Eneo la ‘Tangaza Habari Njema!’ la 2024 kwenye uwanja wa michezo wa Levy Mwanawasa huko Ndola, Zambia. Jumla ya watu 23,336 walikuwepo na kusikia tangazo hilo uso kwa uso. Watu wengine 5,920, waliunganishwa kupitia video mtandaoni katika maeneo mengine matano ambapo kusanyiko hilo lilifanyiwa. Wahudhuriaji katika makusanyiko yote sita ya eneo walipokea nakala iliyochapishwa ya Tafsiri ya Ulimwengu Mpya. Biblia hiyo, pamoja na rekodi za sauti za vitabu vya Ruthu, 1 Yohana, 2 Yohana, na 3 Yohana zingeweza kupakuliwa baada ya tangazo hilo kutolewa.

Biblia Takatifu—Tafsiri ya Ulimwengu Mpya ilitolewa kwa mara ya kwanza katika Kichibemba mwaka wa 2008. Inakadiriwa kwamba watu milioni nne nchini Zambia wanazungumza Kichibemba, kutia ndani ndugu na dada 131,351 katika makutaniko 1,856 na vikundi 8 kotekote nchini.

Julai 19, 2024, Ndugu José Torres, mshiriki wa Halmashauri ya Tawi ya Amerika ya Kati, alitangaza kutolewa kwa Biblia—Habari Njema Kulingana na Mathayo katika Kikwiche. Tangazo hilo lilitolewa wakati wa Kusanyiko la Eneo la ‘Tangaza Habari Njema!’ la 2024 lililofanyiwa San Lucas Sacatepéquez, Guatemala. Watu wote 405 waliohudhuria walipokea nakala iliyochapishwa ya Biblia hiyo. Pia, ingeweza kupakuliwa mara moja kwenye jw.org na kwenye JW Library.

Inakadiriwa kwamba zaidi ya watu milioni moja wanazungumza Kikwiche. Wengi kati ya watu hao wanaishi nchini Guatemala, ambako kutaniko la kwanza la Kikwiche lilianzishwa mwaka wa 2010. Leo, ndugu na dada 387 wanatumikia katika makutaniko 16 kotekote nchini humo.

Julai 28, 2024, mkutano wa pekee ulifanywa kwenye uwanja wa michezo wa Estádio Nacional do Zimpeto huko Maputo, Msumbiji. Jumla ya watu 26,025 walihudhuria programu hiyo uso kwa uso. Watu wengine 64,570 waliunganishwa kupitia video mtandaoni katika maeneo mengine 16.

Wakati wa mkutano huo, Ndugu Fleegle alitangaza kutolewa kwa tafsiri kadhaa, na nakala zilizochapishwa na za kidijitali zingeweza kupatikana mara moja. Alitangaza kutolewa kwa Biblia—Habari Njema Kulingana na Mathayo katika lugha za Makhuwa-Meetto, Makhuwa-Shirima, na Nsenga (cha Msumbiji). Alitangaza pia kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika lugha za Chuabo, Phimbi, na Tewe. Mbali na hilo alitangaza pia kutolewa kwa tafsiri kamili ya Biblia Takatifu—Tafsiri ya Ulimwengu Mpya katika lugha ya Tshwa.

Hilo linamaanisha kwamba baada ya kutolewa kwa tafsiri hizo, sasa Tafsiri ya Ulimwengu Mpya inapatikana katika lugha 300 ikiwa nzima au kwa sehemu!